સેનામાં અધિકારીઓ-જવાનોની ઘટ ચિંતાજનક

સેનામાં અધિકારી અને જવાનોની ઘટવાળી હકીકતનો પહેલો ઝટકો ‘હિંદી-ચીની ભાઈભાઈ’ના નારા આપનારાને ત્યારે લાગ્યો હતો જ્યારે વર્ષ ૧૯૬૨માં ચીને લદાખથી લઈને નેફા (હવેનું અરુણાચલપ્રદેશ)ના સરહદી વિસ્તારોમાં ભારતીય સેનાને પાછળ ધકેલી દીધી હતી

કોઈ પણ દેશના વિકાસ સાથે તેની સુરક્ષા પણ ખૂબ જ મહત્વની હોય છે. ભારત જેવા દેશ માટે તો તેની સેના દરેક મોરચે મજબૂત હોય તે જરૂરી જ નહીં, પરંતુ અનિવાર્ય પણ છે. આપણે ભલે એવું માનતા હોઈએ કે આપણી ભારતીય સેના કોઈ પણ પડકારને પહોંચી વળે તેમ છે, પણ હકીકત અને આંકડાઓ આંખ ખોલનારા છે. લોકસભામાં ગત ૨૧ જુલાઈએ સશસ્ત્ર સેનાઓના અનેક પડકારોની ચર્ચા દરમિયાન બે મોટા પાસાં ઊભરીને સામે આવ્યાં હતાં. એક તો આપણી સેનામાં અધિકારીઓ અને જવાનોની સંખ્યા ઘણી ઓછી છે અને બીજું સંરક્ષણ જેવા મહત્ત્વપૂર્ણ મુદ્દે પણ સંસદની કેન્દ્રીય સ્થાયી સમિતિની કાર્યશૈલી સંતોષજનક નથી.

સંસદમાં સત્તાવાર રીતે જે વિગતો ટેબલ પર મૂકવામાં આવી હતી તે જોઈએ તો, મંજૂર થયેલી ૧૪ લાખથી વધુની શક્તિશાળી સંખ્યા સામે આપણી સેનાની ત્રણેય પાંખ એટલે કે ભારતીય સશસ્ત્ર સેનાઓમાં ૯,૭૯૭ અધિકારી અને ૧.૨૬ લાખ જવાન (સિપાઈ), એરમેન તથા નાવિકની ઘટ છે. સરકાર દ્વારા જાહેર કરવામાં આવેલી વિગતો અનુસાર, સેના (આર્મી)માં ૭,૭૭૯ અધિકારી અને ૧.૦૮ લાખ જવાનની હજુ પણ ઘટ છે. નૌસેનામાં ૧,૪૪૬ અધિકારી અને ૧,૨૯૧ નાવિક તથા એરફોર્સ (વાયુસેના)માં ૫૭૨ અધિકારી અને ૫,૨૧૭ એરમેન્સની ઘટ છે.