AMC દ્વારા સુખીપુરા, ચકુડિયા અને બાપુનગર ગાર્ડનનાં નવીનીકરણ કરાશે

સુખીપુરાને રૂ. ૬૧.૫૬ લાખ, ચકુડિયાને રૂ. ૬૧.૯૦ લાખ અને બાપુનગર ગાર્ડનને રૂ. ૮૦.૧૮ લાખના ખર્ચે નવાં રંગરૂપ અપાશે

અમદાવાદ, બુધવાર

મ્યુનિસિપલ કોર્પોરેશન દ્વારા શહેરના બાગ-બગીચાના જતન માટે ખાસ કાળજી લેવાઈ રહી છે. તાજેતરમાં તંત્રે પ્રસિદ્ધ પરિમલ ગાર્ડનનું કરોડો રૂપિયાના ખર્ચે ખાનગી કંપની પાસે નવીનીકરણ કરાવીને લોકોની પ્રશંસા મેળવી હતી. પરિમલ ગાર્ડનની કાયાપલટ કર્યા બાદ તંત્ર વધુ ત્રણ બગીચાને નવાં રંગરૂપ આપવા જઈ રહ્યું છે. પાલડીનો સુખીપુરા ગાર્ડન, અમરાઈવાડીનો ચકુડિયા ગાર્ડન અને બાપુનગરના બાપુનગર ગાર્ડનના મ્યુનિ. બાગ-બગીચા વિભાગ દ્વારા નવીનીકરણની દિશામાં ચક્રો ગતિમાન કરાયાં છે.

તાજેતરમાં મ્યુનિસિપલ બાગ-બગીચા વિભાગ દ્વારા તંત્રના ખર્ચે સુખીપુરા ગાર્ડન, ચકુડિયા ગાર્ડન અને બાપુનગર ગાર્ડનના નવીનીકરણ માટેનાં ટેન્ડર પ્રસિદ્ધ કરાયાં હતાં. આ ત્રણેય ગાર્ડનમાં વોકિંગ ટ્રેક, પેવર બ્લોક, દીવાલ બનાવવી, પાણીનું નેટવર્ક ઊભું કરવા જેવાં કામોને તંત્રે પ્રાથમિકતા આપી છે.