બોપલ-ઘુમામાં સફાઈનાં ધાંધિયાંથી લોકો પરેશાન

સ્ટેન્ડિંગ કમિટીની બેઠકમાં ખુદ શાસકોએ નરાજગી દર્શાવી નિવેડો લાવવા તાકીદ કરી

અમદાવાદ, સોમવાર

તાજેતરમાં મ્યુનિસિપલ કિંમશનર લોચન સહેરા શહેરના વિવિધ વિસ્તારમાં સવારના સરપ્રાઇઝ રાઉન્ડ લઈ રહ્યા છે, જે દરમિયાન કમિશનર સોલિડ વેસ્ટ, હેલ્થ, રોડ, ડ્રેનેજ સહિતના તંત્રના વિવિધ વિભાગની કામગીરીથી નારાજ થઈ રહ્યા છે. તેમણે પોતાનો અણગમો સ્પષ્ટપણે વ્યક્ત કરીને સંબંધિત સ્ટાફને શો-કોઝ નોટિસ ફટકારીને ભારે ખળભળાટ મચાવી દીધો છે. ખાસ કરીને સફાઈની કામગીરીથી કમિશનર ભારે ખફા થયા છે. શહેરમાં સાફ-સફાઈનું સ્તર યોગ્ય ન હોવાની બાબતને તેમણે ગંભીરતાથી લીધી છે. દરમિયાન મ્યુનિ. કોર્પોરેશનમાં નવા ભેળવાયેલા બોપલ અને ઘુમાના લોકો રસ્તા પરનો કચરો કહો કે ડોર ટુ ડોરની કચરાગાડીની અનિયમિતતા ગણો પણ સફાઈનાં ધાંધિયાંથી ભારે પરેશાન છે. શહેરના જૂના વિસ્તારોની જેમ નવા વિસ્તારોમાં પણ લોકો સફાઈના પ્રશ્ને ભારે હેરાનગતિ ભોગવી રહ્યા છે.