વાદળછાયા વાતાવરણ વચ્ચે ગુલાબી ઠંડીનું આગમનઃ બેવડી ઋતુથી લોકો બેહાલ બન્યા

દિવસે ગરમી અને રાતે ઠંડીના ચમકારાથી અનેક લોકો બીમારીની ઝપટમાં: વાઈરલ ઘર કરી ગયો

અમદાવાદ, ગુરુવાર

નવલી નવરાત્રિની શરૂઆતને આડે હવે ગણતરીના દિવસો બાકી રહ્યા છે ત્યારે અત્યારે રાત્રિ દરમિયાન ઠંડીનો ચમકારો જોવા મળી રહ્યો છે. સવારે વાદળછાયા વાતાવરણ વચ્ચે હળવા ખુશનૂમા પવન સાથે શિયાળાનું આગમન થઈ રહ્યું છે. જો કે અત્યારે બેવડી ઋતુથી તેની શરૂઆત થઇ છે. રાત્રે ઠંડીનો અનુભવ તેમજ દિવસ દરમિયાન તડકો તેમજ ગરમીનો અનુભવ થઇ રહ્યો છે. ગુજરાતમાં છેલ્લા કેટલાક દિવસથી બેવડી ઋતુનો અનુભવ થઈ રહ્યો છે. રાજ્યમાં ઠંડીમાં થઈ રહેલી વધઘટ વચ્ચે વધુ એક વખત વાતાવરણમાં પલટો આવ્યો છે. જેના કારણે તાપમાનમાં ગણતરીના કલાકોમાં આઠ ડિગ્રીનો ઘટાડો નોંધાયો છે.