સોનાની બંગડીની લાલચે મહિલા ઘરઘાટીએ વૃદ્ધાને જીવતાં સળગાવી મોતને ઘાટ ઉતાર્યાં

મેઘાણીનગરનો ચોંકાવનારો બનાવઃ ચાર વર્ષથી મહિલા ઘરઘાટી તરીકે કામ કરતી હતી, વૃદ્ધાએ મરતાં પહેલાં પુત્રવધૂને સોનાની બંગડી કાઢી લીધી હોવાની જાણ કરી

અમદાવાદ, શનિવાર

સોનાની બંગડી લૂંટી લેવાની લાલચમાં ઘરઘાટી વૃદ્ધ મહિલાએ એક વૃદ્ધાને જીવતાં સળગાવી દઇ મોતને ઘાટ ઉતારી દીધાં હોવાની ચોંકાવનારી ઘટના સામે આવી છે. વૃદ્ધા ઘરે એકલાં હતાં ત્યારે મહિલા ઘરઘાટીએ તેમના પર જ્વલનશીલ પદાર્થ નાખીને સળગાવી દીધાં હતાં. ત્યાર બાદ ચુપચાપ બંગડી લઇને નાસી ગઇ હતી. વૃદ્ધા જ્યારે અંતિમ શ્વાસ લઇ રહ્યાં હતાં ત્યારે તેમણે પુત્રવધૂને બોલાવીને કહ્યું હતું કે રંજનબાએ મારી સોનાની બંગડી લઇ લીધી છે. વૃદ્ધાના મોત બાદ પાડોશીના ઘરના સીસીટીવી કેમેરા ચેક કરતાં હત્યારી ઘરઘાટીનાં કરતૂતો સામે આવ્યાં હતાં. વૃદ્ધાને જીવતાં સળગાવી દેવાની ચકચારી ઘટનાથી મેઘાણીનગ૨માં સન્નાટો વ્યાપી ગયો છે.

મેઘાણીનગર વિસ્તારમાં આવેલી તાતાનગર સોસાયટીના મકાન નંબર: ૧૮માં રહેતા સુરેન્દ્રસિંહ જોરૂભા જાડેજાએ ૬૦ વર્ષીય રંજનબા પરમાર મહિલા વિરુદ્ધ નામની ઘરઘાટી હત્યા તેમજ લૂંટની ફરિયાદ કરી છે. સુરેન્દ્રસિંહ જાડેજાને પાલડીમાં ટ્રાવેલ્સનો ધંધો છે અને તેમના ચાર ભાઇઓ છે, જેમાંથી એક ભાઇ મહેન્દ્રસિંહ જાડેજા તેમના પરિવાર સાથે થલતેજ રહે છે.