મોરબી પુલ દુર્ઘટનાનો પડઘોઃ કાંકરિયા લેકફ્રન્ટના સ્ટાફને બચાવની ટ્રેનિંગ અપાઈ

સતત બે દિવસ મોકડ્રિલ યોજાઈ: અટલબ્રિજના સ્ટાફને પણ તાલીમ અપાશે

અમદાવાદ, મંગળવાર

મોરબીના ઝૂલતા પુલની દુર્ઘટનામાં ૧૫૦થી વધુ હતભાગીઓનાં મચ્છુ નદીમાં ડૂબી જવાથી કરુણ મોત નીપજ્યાં હતાં. રવિવાર તા.૩૦ ઓક્ટોબરની સાંજે આ પુલ તૂટી પડતાં સમગ્ર દેશની આંખો દર્દથી ભીંજાઈ હતી. વિદેશથી પણ શ્રદ્ધાસંવેદનાના સૂર મૃતકોના આદરાર્થે આવ્યા હતા. આ દુર્ઘટનાના પગેલ મ્યુનિસિપલ તંત્ર પણ એલર્ટના મોડમાં આવી ગયું છે. સત્તાવાળાઓએ તત્કાળ અટલબ્રિજ પર એક કલાકમાં ત્રણ હજારથી વધુ મુલાકાતીઓને પ્રવેશ આપવો નહીં તેવી નિશ્ચિત લક્ષ્મણરેખા દોરી દીધી હતી તો હંમેશાં મુલાકાતીઓથી ઊભરાતા કાંકરિયા લેકફ્રન્ટ સહિતનાં સ્થળોના સ્ટાફને આકસ્મિક આગ, અકસ્માત કે કોઈ આતંકવાદી કૃત્ય સામે લોકોને સુરક્ષિત રાખવા માટે સુવ્યવસ્થિત ટ્રેનિંગ આપવાની દિશામાં ચક્રો ગતિમાન કરાયાં છે, જે અંતર્ગત ગયા રવિવારે અને સોમવારે કાંકરિયા લેકફ્રન્ટમાં કાર્યરત આશરે ૧૫૦ વ્યક્તિઓને બચાવલક્ષી કામગીરીથી વાકેફ કરાયા હતા.