નાગરિકો બેદરકારઃ સૂકો-ભીનો કચરો અલગ કરવાની સમજણ આપવા તંત્ર પરસેવો પાડશે

ખોખરાની ડેન્ટલ કોલેજ ખાતે ઝીરો વેસ્ટ ઈવેન્ટ હેઠળ ખાસ તાલીમ કાર્યક્રમ યોજાયો

અમદાવાદ, સોમવાર

આપણા શહેરને સ્વચ્છ, સુંદર અને સુઘડ બનાવવાની જવાબદારી સૌની છે. મ્યુનિસિપલ કોર્પોરેશન અમદાવાદને સૂથરું બનાવવાની જહેમત ઉઠાવે છે તો બીજી બાજુએ નાગરિકો સાફપણ સ્વયંભૂ આત્મશિસ્ત કેળવીને સફાઈના મામલે પોતાની જવાબદારી સમજે તે આજના સમયની તાતી જરૂરિયાત છે, પરંતુ દુર્ભાગ્યે ફાઇવ-જીની અત્યાધુનિક જમાનામાં લોકો અન્ય બાબતોની ટેક્નોલોજીના જેમ સ્વચ્છતાના મામલે સ્માર્ટ બન્યા નથી. અનેક કિસ્સામાં નાગરિકોની બેજવાબદારી પ્રકાશમાં આવી રહી હોઈ અમદાવાદ અસ્વચ્છ જ રહે છે. ખાસ કરીને ઘરે ઘરેથી એકઠા કરાતા કચરાને સૂકો અને ભીનો એમ અલગ રીતે તારવીને મ્યુનિસિપલ તંત્રની કચરાગાડીના હવાલે કરવાના બદલે અસંખ્ય લોકો સૂકો-ભીનો કચરો એકઠો રાખે છે, જોકે હવે મ્યુનિ. સોલિડ વેસ્ટ મેનેજમેન્ટ વિભાગ સિવિલ સેન્સ ન રાખતાં લોકોને આવી સમજણ આપવા પરસેવો પાડશે.