૨૦૧૨ની ૯ ફેબ્રુઆરીએ ૫.૨ ડિગ્રી રેકોર્ડ ઠંડીએ અમદાવાદીઓને ધ્રુજાવી દીધા હતા

છેલ્લાં ૧૦ વર્ષમાં ગરમીનો રેકોર્ડ ૩૭.૮ ડિગ્રીનો ૨૪ ફેબ્રુઆરી, ૨૦૧૫એ નોંધાયો હતો

અમદાવાદ, શુક્રવાર

અત્યારે કાતિલ ઠંડીના ધ્રુજારામાંથી અમદાવાદ અને ગુજરાત પસાર થઈ ચૂક્યાં હોઈ હવે સામાન્ય ઠંડીના ચમકારા અનુભવાય છે. સવારે ઠંડી, બપોરે ગરમી અને મોડી સાંજે ફરી ઠંડક પ્રસરી જવાથી લોકો ટ્રિપલ સિઝનનો અનુભવ કરી રહ્યા છે, જેના કારણે શરદી, ખાંસી અને તાવ જેવાં વાઈરલ ઈન્ફેક્શનના કેસ પણ વધ્યા છે. ફેબ્રુઆરી મહિનામાં ઠંડીનો રેકોર્ડ તપાસીએ તો છેલ્લાં ૧૦ વર્ષમાં તા. ૯ ફેબ્રુઆરી, ૨૦૧૨ દરમિયાન અમદાવાદમાં સૌથી વધુ પ.૨ ડિગ્રી ઠંડી પડતાં શહેરીજનો ધ્રૂજી ઊઠ્યા હતા. રેકોર્ડ હજુ સુધી અકબંધ રહ્યો છે.