અમદાવાદમાં ધુમ્મસ અને ઠંડા પવનો વચ્ચે સર્યનારાયણે દેખા દેતા હાશકારો

વીજળી ત્રાટકતાં બે ખેડૂતે જીવ ગુમાવ્યાઃ હજુ ૨૪ કલાક વરસાદની આગાહી

અમદાવાદ, મંગળવાર

ગઈ કાલ સાંજે મેઘરાજાએ ભારે પવન સાથે અચાનક જ પધરામણી કરતાં હોલિકાદહનના રંગમાં ભંગ પડ્યો હતો. ક્યાંક વરસાદનું જોર વધતાં હોલિકામાતાને તાડપત્રીથી ઢાંકવાની ફરજ પડી હતી. તેમ છતાં ભાવિક ભક્તોએ શ્રદ્ધાપૂર્વક વરસતા વરસાદની વચ્ચે હોળીની પવિત્ર જ્વાળાઓ ફરતે પ્રદક્ષિણા કરી હતી. ઘર-પરિવારનાં કષ્ટોના નાશ માટે પ્રાર્થના કરવા અમુક જગ્યાએ શ્રદ્ધાળુઓએ છત્રીનો આશરો પણ લીધો હતો. ફાગણના દિવસોમાં અષાઢી મેઘ ત્રાટકતાં લોકો આશ્ચર્યચકિત થયા હતા. દરમિયાન, અમદાવાદમાં આજે ધુમ્મસ અને ઠંડા પવનો વચ્ચે સૂર્યનારાયણે આકાશમાંથી દેખા દેતાં લોકોએ હાશકારો અનુભવ્યો હતો. જોકે સવારે અંશતઃ વાદળછાયું વાતાવરણ જોવા મળ્યું હતું.