સાયબર ઠગ માટે બોપલ ‘સોફ્ટ ટાર્ગેટ': વધુ એક યુવકને છેતરી ૩.૪૯ લાખ પડાવી લીધા

યુટ્યૂબના વીડિયો જોઈને લાઇક કરો અને ઘરબેઠા કમાણી કરો તેવી લાલચ આપીને યુવકને જાળમાં ફસાવ્યોઃ છેલ્લા એક મહિનામાં બોપલના અનેક રહેવાસીઓ સાયબર ફ્રોડનો શિકાર બન્યા

અમદાવાદ, સોમવાર

શહેરમાં સાયબર ક્રાઇમના કેસમાં ઓચિંતો વધારો થયો છે અને ઓનલાઇન છેતરપિંડી આચરતી ઠગ ટોળકીએ હવે બોપલને સોફ્ટ ટાર્ગેટ બનાવ્યું છે. છેલ્લા એક મહિનાથી બોપલ વિસ્તારમાં સાયબર ક્રાઇમના ગુનાઓ વધ્યા છે ત્યારે વધુ એક ઠગાઈનો કિસ્સો બોપલ વિસ્તારમાં બન્યો છે. જેમાં યુટ્યૂબ વીડિયોમાંથી કમાણી કરવાના બહાને યુવક સાથે ૩.૪૯ લાખ રૂપિયાની છેતરપિંડી કરવામાં આવી હતી. બોપલ પોલીસે કેસ નોંધીને તપાસ શરૂ કરી છે.

બોપલમાં રહેતા અંકિત પટેલે બોપલ પોલીસ સ્ટેશનમાં ફરિયાદ નોંધાવી છે. અંકિત ખાનગી કંપનીમાં નોકરી કરે છે. અંકિતને વોટ્સએપ ૫૨ ઓફર મળી હતી. જેમાં તેને ડિજિટલ માર્કેટિંગમાં રોકાણ કરીને જંગી વળતર આપવામાં આવશે તેમ જણાવાયું હતું. આ માટે અંકિતને ટેલિગ્રામ એપ પર યુટ્યૂબ વીડિયો જોઈને લાઈક કરવાનો રહેશે અને તે ઘરે બેસીને મોટી કમાણી કરી શકે છે.

અંકિતને સૌપ્રથમ ટેલિગ્રામ ગ્રૂપમાં એડ કરવામાં આવ્યો હતો. પોસ્ટ દ્વારા તેને કહેવામાં આવ્યું હતું કે તેણે યુટ્યૂબ પર વીડિયો જોઈને તેને લાઈક કરવાનો છે અને શરૂઆતમાં અંકિતને વીડિયો જોવા અને લાઈક કરવા માટે થોડા નામે રૂપિયા આપવામાં આવ્યા હતા, પરંતુ ત્યારબાદ અસલી ખેલ શરૂ થયો હતો.