અમદાવાદમાં ૧૫ મેથી ગરમીની તીવ્રતા ઘટીને ૪૦ ડિગ્રી થાય તેવી શક્યતા

આજે તો ગરમીનો પારો ૪૪ ડિગ્રીએ પહોંચવાનો હોવાથી લોકોને કામ સિવાય ઘર બહાર નહીં નીકળવા સલાહ

અમદાવાદ, ગુરુવાર

છેલ્લા બે-ત્રણ દિવસથી અમદાવાદીઓ ત્વચાને દઝાડે તેવી ભીષણ ગરમીનો અનુભવ કરી રહ્યા છે. સવારથી જ આકાશમાંથી આગ ઝરતો તડકો પડી રહ્યો છે. ગઈ કાલે તો શહેરમાં ૪૩.૫ ડિગ્રી જેટલી આકરી ગરમી પડી હતી. મ્યુનિસિપલ તંત્ર દ્વારા તા. ૧૪ મે સુધી શહેરમાં ૪૩ ડિગ્રી ગરમી નોંધાવાની હોઈ ત્યાં સુધી ઓરેન્જ એલર્ટ જાહેર કરાયું છે, જોકે તા. ૧૫ મેથી ગરમીની તીવ્રતા ઘટીને ૪૦ ડિગ્રી થવાની શક્યતા હવામાન વિભાગે વ્યક્ત કરી છે.