ફરસાણના ભાવ આસમાને: અમદાવાદી સ્વાદ રસિયાઓને 'પરસેવો' વળી ગયો!

સીંગતેલ-પામોલીન તેલના ભાવમાં ઘટાડો થવા છતાં પણ ફરસાણના ભાવ સતત ઉછળતાં હોવાથી લોકો પરેશાન

અમદાવાદ, ગુરુવાર:

દરેક સામાન્ય માણસની ફરિયાદ એ છે ખાદ્યતેલના ભાવમાં વધારો થાય કે બીજા જ દિવસે ફરસાણના ભાવ અચક વધી જાય છે પણ ખાદ્યતેલનો ભાવ ઘટે ત્યારે ફરસાણના ભાવ ઘટતા નથી. ફરસાણ સામાન્ય રીતે મોટા ભાગે કપાસિયા તેલમાં બને છે, પરંતુ છેલ્લા આઠ માસમાં કપાસિયા અને પામોલીન તેલના ડબામાં રૂ.૧૨૫૦નો જબ્બર ઘટાડો થયો છે પણ શહેરમાં ફરસાણનો ભાવ તો ઘટવાના બદલે વધ્યો જ છે.

ખાદ્યતેલના ભાવ વધારાના કારણે ફરસાણના વેપારીઓના નફામાં ચોક્કસ વધારો થાય છે, જ્યારે લોકોને ખાદ્યતેલના ઘટાડાથી ફરસાણ સસ્તું થાય તેનો લાભ મળતો નથી. તેલના ભાવમાં એવરેજ ૪૦ ટકા જેટલો ઘટાડો થયો છે, પરંતુ ફરસાણના ભાવ ઘટવાના બદલે અત્યાર સુધીમાં ૫૦ ટકા જેટલા વધી ગયા છે, જેના કારણે વેપારીઓના નફાનું પ્રમાણ વધતું જ રહે છે.