આખરે પ્રેમમાં કેમ થઈ રહી છે હિંસા?

કોઈ વ્યક્તિની આટલી નિર્મમતાથી હત્યા કે પછી કોઈનો જીવ લેવો ગુનો કરનારને ડરાવતું કેમ નથી? ડર ફક્ત ખરાબ નથી હોતો, ક્યારેક ડરવું જરૂરી પણ છે. ડરવું આપણને આવા જઘન્ય ગુનાઓથી બચાવી શકે છે

છેલ્લા થોડા સમયથી આપણે સમાજમાં પ્રેમમાં હિંસાની ઘટનાઓને વધુ પ્રમાણમાં જોઈ રહ્યા છીએ. થોડા થોડા દિવસે ગાઢ પ્રેમમાં ડૂબેલા, પ્રેમ ખાત૨ ઘર-પરિવારને છોડીને ચાલ્યા ગયેલા લોકો કોઈ પણ કારણસર પોતાના પ્રેમને હિંસાત્મક રીતે ખતમ કરી રહ્યા છે. પહેલાં લોકો પ્રેમ માટે જીવ આપી દેતા, આજે લઈ રહ્યા છે. આ એક ચિંતા ઉપજાવનારી બાબત છે.

દિલ્હીની એક કોલોનીમાં રહેતી સાક્ષીએ સાહિલ સાથે વાતચીત કરવાનું બંધ કરી દીધું, કેમ કે તેને અન્ય એક યુવક સાથે મિત્રતા થઈ ગઈ હતી. તેણે સાહિલ સાથે વાતચીત કરવાનું બંધ કર્યું, જે વાતને સાહિલ સહન ન કરી શક્યો. આ વાત તેને અપમાન જેવી લાગી અને તેના મનમાં ખટકવા લાગી. તેણે એક ચપ્પુ ખરીદ્યું અને જ્યારે સાક્ષી રસ્તામાં મળી ત્યારે સાહિલે તેને ચપ્પુના ૧૬ ઘા મારી દીધા. આટલેથી તેનું મન ન ભરાયું તો તેણે પથ્થરથી માથું કચડી નાખ્યું અને સાક્ષીનું મૃત્યુ થઇ ગયું.

લોકો તમાશો જોતા રહ્યા. કોઈએ તેને બચાવવાની કોશિશ ન કરી. જો કોઈ બચાવવાનું વિચારેત તો સાક્ષી બચી જાત, કેમ કે સાહિલ એકલો હતો અને સામે આઠથી દસ જણ હતા, જોકે સાહિલના હાથમાં ચપ્પુ હતું. તેથી લોકો પણ ડરે તે સ્વાભાવિક છે, જેણે પણ આ ઘટનાનો વીડિયો જોયો તેઓ ચોંકી ગયા.