રખડતાં ઢોરની સમસ્યા નિવારવા તંત્ર મક્કમઃ છેલ્લા ત્રણ મહિનામાં ૩,૧૨૩ ઢોર ડબ્બે પૂર્યા

વર્ષ ર૦રર-ર૩માં ઢોર ત્રાસ અંકુશ વિભાગ દ્વારા કુલ ૧૯,૨૪૫ ઢોર ઝબ્બે કરાયાં હતાં

અમદાવાદ, ગુરુવાર

મોટા ભાગના શહેરીજનોને રખડતાં ઢોરની રંજાડનો કડવો અનુભવ છે. અમદાવાદના મોટા ભાગના વિસ્તારોમાં રખડતાં ઢોરથી લોકો ત્રાસી ઊઠ્યા છે. મ્યુનિસિપલ કમિશનરના સ્તરે પણ અવારનવાર આ મુદ્દો ચર્ચાતો રહ્યો છે. તાજેતરમાં ગુજરાત હાઈકોર્ટમાં પણ રખડતાં ઢોરના મામલે વિસ્તૃત ચર્ચા થઈ હતી. તંત્રના ઢોર ત્રાસ અંકુશ વિભાગ દ્વારા શહેરમાં રખડતાં ઢોરને પકડી તેમને બહેરામપુરાના કરુણા મંદિર તરીકે ઓળખાતા ઢોર પૂરવાના ડબાના હવાલે કરવામાં આવે છે. દરમિયાન ચાલુ નાણાકીય વર્ષ ૨૦૨૩-૨૪ના છેલ્લા ત્રણ મહિનામાં તંત્રે કરેલી રખડતાં ઢોરને પકડવાની કામગીરીની વિગતને જોતાં ગત એપ્રિલ, મે અને જૂનમાં સત્તાવાળાઓએ કુલ ૩,૧૨૩ ઢોર પકડ્યાં છે.