ભાવનગર, વલસાડ, દમણ, દાદરા અને નગર હવેલીમાં આજે રેડ એલર્ટ જારી

અમદાવાદ, બનાસકાંઠા, સાબરકાંઠા, આણંદ અને ભરૂચ માટે ઓરેન્જ એલર્ટ અપાયું

અમદાવાદ, શનિવાર

ગુજરાતમાં વરસાદના ત્રીજા રાઉન્ડે ધબધબાટી બોલાવી છે. સૌરાષ્ટ્ર સહિતના અનેક વિસ્તારમાં અતિભારે વરસાદે તારાજી સર્જી છે. લોકો વરસાદના તાંડવથી તોબા પોકારી ઊઠ્યા છે તેમ છતાં વરસાદનું જોર ઘટવાની શક્યતા નથી. આજે રાજ્યના ભાવનગર, વલસાડ, દમણ, દાદરા-નગર હવેલી માટે રેડ એલર્ટ અપાયું છે. આ સિવાય અમરેલી, ગીર-સોમનાથ અને દીવમાં પણ ભારેથી અતિભારે વરસાદની શક્યતા સ્થાનિક હવામાન વિભાગ દ્વારા વ્યક્ત કરાઈ છે. મેઘરાજા હજુ ત્રણ દિવસ ગુજરાતને ધમરોળશે. દરમિયાન જામનગરમાં ધોધમાર વરસાદ પડતાં અનેક ગામને એલર્ટ કરાયાં છે. શત્રુંજી ડેમના ૨૦ અને મધુબન ડેમના ૧૦ દરવાજા ખોલી નાખવામાં આવ્યા છે.

સ્થાનિક સ્ટેટ ઇમર્જન્સી ઓપરેશન સેન્ટરનાં સૂત્રોના જણાવ્યા મુજબ છેલ્લા ૨૪ કલાકમાં રાજ્યના ૧૩૦ તાલુકામાં વરસાદ વરસ્યો છે, જેમાં વલસાડના કપરાડામાં સૌથી વધુ સવા દસ ઈંચ વરસાદ પડતાં સર્વત્ર જળબંબાકાર થયું છે. રાજ્યના નવ તાલુકામાં પોણો-પોણો ઈંચ અને ૧૩ તાલુકામાં અડધો-અડધો ઈંચ વરસાદ ખાબક્યો છે. એક પ્રકારે રાજ્યમાં સાર્વત્રિક વરસાદ નોંધાયો છે.