વીડિયો ઉતારી રહ્યો હોવાની ગેરસમજ: મોડી રાતે લુખ્ખાં તત્ત્વોએ આતંક મચાવ્યો

નવા નરોડાનો બનાવઃ સોસાયટીમાં રહેતા માથાભારે શખ્સે સાગરીતો સાથે મળી વાહનોમાં તોડફોડ કરી, મહિલાની છેડતી કરીને હુમલો કર્યોઃ તલવાર અને ડંડા લઈને શખ્સો આવ્યા હતા

અમદાવાદ, મંગળવાર

વીડિયો ઉતારી રહ્યો હોવાની ગેરસમજના કારણે મોડી રાતે લુખ્ખાં તત્ત્વોએ તલવાર અને ડંડા લઇને વાહનોમાં તોડફોડ કરીને મહિલાની છેડતી કરતાં ચકચાર મચી ગઇ છે. યુવક ગઇ કાલે વીડિયો કોલ ૫ર મામા સાથે વાત કરતો હતો ત્યારે તેની જ સોસાયટીમાં રહેતા એક માથાભારે શખ્સને લાગ્યું કે તે મારો વીડિયો ઉતારી રહ્યો છે. વીડિયો ઉતારવાની ગેરસમજના કારણે માથાભારે શખ્સે યુવકને માર માર્યો હતો. આ ઘટનાના પગલે સમાધાન થઇ ગયું હતું, પરંતુ માથાભારે શખ્સ મોડી રાતે તેના સાગરીતો સાથે આવ્યો હતો અને સોસાયટીમાં રીતસરનો આતંક મચાવી દીધો હતો.