અખિયાં મિલાકેઃ શહેરમાં દોઢ મહિનાથી પણ ઓછા સમયમાં ૮૭ હજારથી વધુ સત્તાવાર કેસ

૧૦ જુલાઈથી શહેરીજનોમાં કન્જક્ટિવાઇટિસનો વાવર ફેલાઈ રહ્યો છેઃ ૨૮ જુલાઈએ સૌથી વધુ ૭૨૮૧ કેસ નોંધાયા હતા

અમદાવાદ, શુક્રવાર

ચાલુ ચોમાસાની ઋતુમાં નાગરિકો પાણીજન્ય રોગચાળાથી પરેશાન થઈ ઊઠ્યા છે. શહેરમાં આ મહિનામાં કોલેરાના ૨૦, ટાઇફોઇડના ૪૬૭, કમળાના ૧૧૪ અને ઝાડા-ઊલટીના ૬૧૯ સત્તાવાર કેસ નોંધાયા છે, જ્યારે મચ્છરોના ઉપદ્રવથી પણ ડેન્ગ્યુના ૪૦૦ કેસ નોંધાતાં આ રોગે પણ લોકોમાં ભારે ફફડાટ ફેલાવી દીધો છે. આની સાથે લોકો અખિયાં મિલાકે એટલે કે કન્જક્ટિવાઇટિસથી પણ હેરાન થઈ ગયા છે. મ્યુનિ. હેલ્થ વિભાગના એક સત્તાવાર રિપોર્ટ મુજબ છેલ્લા દોઢ મહિનાથી પણ ઓછા સમયગાળામાં શહેરમાં ૮૦ હજારથી પણ વધુ સત્તાવાર કેસ નોંધાઈ ચૂક્યા છે. સેંકડો લોકોએ પોતાની રીતે રોગની સારવાર લીધી હોઈ તેવા કેસ તંત્રના ચોપડે નોંધાયા ન હોઈ અખિયાં મિલાકેના રોગીઓની સંખ્યા એક લાખથી પણ વધુ થઈ હોવાની ચર્ચા ઊઠી છે.