લગ્નનું તરકટ રચી બે લૂંટેરી દુલહન પ્રૌઢ અને યુવક સાથે ચીટિંગ કરી ફરાર થઈ ગઈ

લગ્ન કરીને ઘેર પહોંચે તે પહેલાં જ બે લૂંટેરી દુલહનબાથરૂમ જવાના બહાને ગાયબ થઈ ગઈ

શહેરમાં વધુ એક વખત લૂંટેરી દુલહનનો ચોંકાવનારો કિસ્સો પ્રકાશમાં આવ્યો છે. બે લૂંટેરી દુલહન એક જ ગામમાં રહેતા આધેડ તેમજ યુવક સાથે ચીટિંગ કરીને ફરાર થઇ ગઈ છે. જામનગર જિલ્લાના એક ગામમાં રહેતા બે લોકોએ અમદાવાદમાં લગ્ન કર્યાં હતા. ત્યાર બાદ જ્યારે બંને દુલહનને લઇ જઇ રહ્યા હતા ત્યારે તે બાથરૂમ કરવાના બહાને નાસી ગઈ હતી.

એકલવાયું જીવન જીવતા આધેડ સહિત અન્ય એક વ્યક્તિને લગ્ન કરવા ભારે પડ્યાં છે. મેરેજ બ્યૂરો મારફતે બંને વ્યક્તિઓએ લગ્ન તો કર્યાં, પરંતુ જ્યારે દુલહનને લઇ ઘરે પરત જતા હતા ત્યારે તે હોટલમાં જમવા માટે રોકાયા આ દરમિયાન બાથરૂમ જવાનું કહીને બંને યુવતીઓ કારમાં બેસીને ફરાર થઇ ગઇ હતી. બંને વ્યક્તિઓએ જ્યારે મેરેજ બ્યૂરોના સંચાલકને જાણ કરી ત્યારે તેણે ફોન સ્વિચ ઓફ કરી દીધો. જે અંગે પોલીસને જાણ કરતાં પોલીસે છેતરપિંડીનો ગુનો દાખલ કરીને વધુ તપાસ શરૂ કરી છે.