અમદાવાદ-મહેસાણામાં રાધે ગ્રૂપ અને મોરબીમાં સિરામિક ટાઇલ્સના વેપારી પર આઈટીના દરોડા

પ્રાથમિક તપાસમાં રૂ. ૧૦૦ કરોડના હિસાબી ગોટાળાના દસ્તાવેજો મળ્યા ૧૦૦થી વધુ અધિકારીઓ SRP બંદોબસ્ત સાથે ૧૫થી ૨૦ સ્થળોએ દરોડામાં જોડાયા

રોકડ રકમ અને ઝવેરાત પણ જપ્ત કરાયાં

આવકવેરા વિભાગના અધિકારીઓએ આજે વહેલી સવારથી મહેસાણામાં રિયલ એસ્ટેટની સાથે કન્સ્ટ્રકશનનો બિઝનેસ કરતા રાધે ગ્રૂપના બિલ્ડર અને તેમના ભાગીદાર તેમજ બે સિરામિક ટાઈલ્સના વેપારીઓ, ફાઈનાન્સર અને જમીન દલાલને ત્યાં અમદાવાદ, મહેસાણા, મોરબી, રાજકોટ, રાધનપુર અને વિજાપુર સહિત ૧૫થી વધુ સ્થળે દરોડાની કામગીરી શરૂ કરી છે. દરોડાની કાર્યવાહી દરમિયાન ઈન્કમટેક્સના અધિકારીઓએ રાધે ગ્રૂપના બિલ્ડર મહેન્દ્ર પટેલ તેમજ તેમના ભાગીદારો અને રાધે ગ્રૂપ અને તેમના ભાગીદારોના નામે ચાલતી ૨૦થી ૨૫ જેટલી સહભાગી કંપનીઓને પણ તપાસમાં આવરી લીધી છે. મોરબીમાં સિરામિક ટાઇલ્સનું ઉત્પાદન કરતી બે ફેક્ટરીઓમાં પણ દરોડાની કામગીરી શરૂ કરવામાં આવી છે.