ముంచుకొస్తున్న కోడ్ ముప్పు

• పథకాల సత్వర అమలుపై ప్రభుత్వ తర్జనభర్జన • స్కీముల ప్రక్రియను వేగవంతం చేయాలని ముఖ్యమంత్రి సంకల్పం 

• గ్యారెంటీలపై సర్కారుపై పెరిగిన ఒత్తిడి 

• వంద రోజుల్లో ఆరు పథకాల అమలుపై అధికార యంత్రాంగం ఉరుకులు పరుగులు 

• కోడ్ వచ్చే లోపు పథకాల అమలు అసాధ్యమని పేర్కొంటున్న ప్రధాన ప్రతిపక్షం

తెలంగాణ బ్యూరో ప్రతినిధి హైదరాబాద్: మార్చి 17వ తేదీ నాటికి కాంగ్రెస్ పార్టీ అధికారంలోకి వచ్చి వందరోజుల పదవీ కాలాన్ని పూర్తి చేసుకోబోతోంది. ఈ నేపథ్యంలో మొత్తం ఆరు గ్యారెంటీలను మూడున్నర నెలల కాలంలోవు అమలు చేసే దిశగా ప్రభుత్వం కసరత్తు చేస్తున్నది.వందరోజుల కన్నా ముందే పార్లమెంట్ ఎన్నికలకు సంబంధించి కోడ్ అమలులోకి రానున్నది. ఫలితంగానే మొత్తం ఆరు గ్యారెంటీలను పూర్తిగా అమలు చేయాలని ముఖ్యమంత్రి నిర్దిష్టమైన కార్యక్రమంగా పెట్టుకు న్నారు. అయితే క్షేత్రస్థాయిలో పరిపాలన పరంగా దీనికి సంబంధించి అనేక అడ్డంకులు సైతం లేకపోలేదు. వాటిని అధిగమించి ఆరు గ్యారెంటీలను పూర్తి చేసి పార్లమెంట్ ఎన్నికల్లోకి వెళ్లాలనే లక్ష్యం కాంగ్రెస్ పార్టీలో కనిపిస్తున్నది. ఒకవైపు నిధుల కొరత, మరోవైపు ఇచ్చిన హామీలు భారీ బడ్జెట్ తో కూడుకున్నవి కావడంతో అతి స్వల్ప కాలంలో వాటిని అమలు చేయడం ప్రభుత్వానికి ఒక ఛాలెంజ్ గా మారింది. మరోవైవు ఎన్నికల కోడ్ సమీపిస్తున్న నేపథ్యంలో ప్రధాన ప్రతిపక్షమైన బి.ఆర్.ఎస్ పార్టీ సర్కారు హామీలపై నిలదీయడం ప్రారంభించింది. పార్లమెంట్ ఎన్నికల కోడ్ ఎంతో దూరం లేకపోవడంతో ముఖ్యమంత్రి తక్షణ కార్యాచరణ అమలు చేసేందుకు సిద్ధమవుతున్నారు.