ஆசியக் கிண்ணம்: குழு பியிலிருந்து சுப்பர் 4க்கு முன்னேறுவது யார்?

ஆசியக் கிண்ணத் தொடரானது நாளை மறுதினம் ஆரம்பிக்கவுள்ளது. இம்முறை ஆறு அணிகள் பிரதான தொடரில் விளையாடவுள்ளன. இலங்கை, இந்தியா, பாகிஸ்தான், பங்களாதேஷ், ஆப்கானிஸ்தான் ஆகியன நேரடியாக பிரதான தொடருக்குத் தகுதி பெற்றுள்ளதுடன், ஆறாவது அணியானது தகுதிகாண் போட்டிகளிலிருந்து தெரிவு செய்யப்படவுள்ளது.

- முருகவேல் சண்முகன்

இந்நிலையில், பிரதான தொடரில் பங்கேற்கும் ஆறு அணிகளும் மூன்று மூன்றாக இரண்டாகப் பிரிக்கப்பட்டு, ஒவ்வொரு குழுவிலும் லீக் முறையில் போட்டிகள் நடைபெற்று அதில் முதலிரண்டு அணிகளும் சுப்பர் ] 4 சுற்றுக்குத் தகுதி பெற்று, சுப்பர்  4 சுற்றில் லீக் முறையில் போட்டிகள் இடம்பெற்று முதலிரண்டு அணிகளும் இறுதிப் போட்டிக்குத் தகுதி பெறவுள்ளன.

அந்த வகையில் இப்பத்தியானது குழு பியில் இடம்பெற்றுள்ள இலங்கை, ஆப்கானிஸ்தான், பங்களாதேஷ் அணிகளைப் பற்றி ஆராய்கிறது.

ஏறத்தாழ மூன்று அணிகளும் இக்குழுவில் சமபல அணிகளாகக் காணப்படுவதோடு, இதில் எந்த இரண்டு அணிகள் முன்னேறினாலும் ஆச்சரியப்படுவதுக்கில்லை.

அண்மைய காலப் பெறுபேறுகளை வைத்துப் பார்க்கும்போது ஆப்கானிஸ்தான், இலங்கை ஆகியன சுப்பர்- 4 சுற்றுக்கு முன்னேறும் என எதிர்பார்க்கப்படுகிறது.

இலங்கையணியைப் பொறுத்த வரையில் மகேஷ் தீக்ஷன, வனிடு ஹஸரங்க, ஜெஃப்ரி வன்டர்சே, தனஞ்சய டி சில்வா, சரித் அஸலங்க என பலமான சுழற்பந்துவீச்சு வரிசையே இலங்கையின் பலமாக குறிப்பிட்டுச் சொல்லக்கூடியதாகக் காணப்படுகிறது.

காயம் காரணமாக துஷ்மந்த சமீரவை இலங்கை இழந்தமையானது அவ்வணிக்கு பின்னடைவாகக் காணப்படுகிறது. வேகப்பந்துவீச்சைப் பொறுத்தவரையில் அனுபவமற்ற பிரமோத் மதுஷன், டில்ஷான் மதுஷங்க, மதீஷ பத்திரண ஆகியோரே குழாமில் காணப்படுகின்றனர்.