தடையற்ற வர்த்தகம், முதலீடுகள் மூலம் வறுமையைப் போக்கலாம்

உலக நாடுகள் தடையற்ற வர்த்தகம், முதலீடுகள் ஆகியவற்றின் மூலம் பொருளியல் வளர்ச்சியைத் தக்கவைத்துக்கொண்டு,வறுமையை எதிர்த்துப் போரிடலாம் என்று பிரதமர் லாரன்ஸ் வோங் கூறியுள்ளார்.

வளர்ச்சியும் வர்த்தகமும் வேலைவாய்ப்புகளை உருவாக்குவதற்கான ஆகச் சிறந்த வழி என்று நவம்பர் 18ஆம் தேதி நடந்த ஜி20 நாடுகளின் தலைவர்களுடனான கலந்துரையாடலில் அவர் குறிப்பிட்டார்.

வறுமை, பசி ஆகியவை தொடர்பான அந்தக் கலந்துரையாடல் பிரேசிலின் ரியோ டி ஜெனிரோவில் நடைபெறும் ஜி20 உச்சநிலை மாநாட்டில் இடம்பெற்றது.

“வேலைவாய்ப்புகள் வறுமையைக் குறைப்பதற்கான நேரடி வழி,” என்றார் திரு வோங். வேலைவாய்ப்பு என்பது தகுதி, நிலைத்தன்மை, தற்சார்பு ஆகியவற்றை வழங்குவதை அவர் சுட்டினார்.

இந்தக் காரணங்களால் உலக வர்த்தக நிறுவனத்தை மறுசீரமைப்பதும் வலுப்படுத்துவதும் முக்கியமாகிறது என்று பிரதமர் கூறினார்.