రద్దీ పెరిగితే కొండపై చాంతాడంత క్యూలైన్లు!

ఏడుకొండల శ్రీవేంకటేశ్వరస్వామి దర్శనార్థం 40వేలమందికి పైగా భక్తులు పెరిగితే తిరుమలకొండపై చాంతాడంత దూరం క్యూలైన్లు బారులు తీరుతాయి.

నాలుగైదు కిలోమీటర్లు పైగా భక్తుల కష్టాలు

ప్రభాతవార ప్రతినిధి-తిరుమల: ఏడుకొండల శ్రీవేంకటేశ్వరస్వామి దర్శనార్థం 40వేలమందికి పైగా భక్తులు పెరిగితే తిరుమలకొండపై చాంతాడంత దూరం క్యూలైన్లు బారులు తీరుతాయి. మూడు నాలుగు కిలోమీటర్లు భక్తులు క్యూలైన్లలోనే నిలబడి గంటలతరబడి నిరీక్షించి అవస్థలు పడుతున్నారు. సాధారణరోజుల్లోనే భక్తుల సంఖ్య ఓ మోస్తరుగా ఉంటే సాధారణ సర్వదర్శనానికి సామాన్యభక్తులను తిరుమలలో లేపాక్షి కూడలినుంచిగానీ, ఎస్ఎంసి కూడలి నుంచి క్యూలైన్లలో అనుమతినిస్తారు. ఇక్కడ నుంచి భక్తులు ఎస్ఎంసి జనరేటర్ మీదుగా టిబిసి, ఏటిసి కాటేజీల క్యూలైన్ల ద్వారా నారాయణగిరి ఉద్యానవనాల్లోని అదనపు క్యూలైన్లలోంచి వైకుంఠం - 2 కంపార్టుమెంట్లలోనికి చేరుకోవాల్సి వస్తోంది. ఈ తతంగం కోసం ఈ సుమారుగా ఐదారుగంటలుపైగానే భక్తులు వెలుపల క్యూలైన్లలో పలు రకాల ఇబ్బందులకు గురవుతు న్నారు. మరీ చంటిపిల్లలు, వృద్ధులు ఉన్న భక్తుల అవస్థలు వర్ణనాతీతం.