ஒரு மாநிலத்தில் உள்நாட்டுப் போர் போன்று எரியும் நிலையில் ‘இரட்டை என்ஜின் ஆட்சி' கவனம் தீவிரமாக வேண்டாமா?

பிரதமர் சென்று மக்களிடையே நம்பிக்கை ஊட்டினாரா? ,மக்களின் கண்ணீரில் காவிகள் நீந்துகிறார்களா?

* மணிப்பூர் மாநிலம் பற்றி எரிகிறது! எரிகிறது!!

* மதவாத சக்திகளே இந்தக் கொடுமைக்குப் பின்னணி!

இந்தியாவின் ஒரு மாநிலமான மணிப்பூரில் உள்நாட்டுப் போர் போல பற்றி எரியும் ஒரு காலகட்டத்தில், அதுகுறித்து எதையும் பொறுப்போடு பேசாமலும், கண்டுகொள்ளாமலும் தனி விமானத்தில் அமெரிக்கப் பயணத்தை மேற்கொண்டுள்ளார் இந்தியப் பிரதமர் நரேந்திர மோடி, இந்த காவி ஆட்சியை வீழ்த்திட வெகுமக்கள் ஒன்று திரண்டு போராடுவது முக்கியம் என்று திராவிடர் கழகத் தலைவர் ஆசிரியர் கி.வீரமணி அவர்கள் அறிக்கை விடுத்துள்ளார்.

அவரது அறிக்கை வருமாறு:

மணிப்பூர் தீப்பற்றி எரிந்து சாம்பலாகிறது

பல நூற்றுக்கணக்கான ஆண்டுகளாக பன்முகத்தன் மையுடன் ஒற்றுமையாக வாழ்ந்த சமூகங்களின் ஒருமித்த ஒற்றுமை வன்முறைத் தீயில் அழிந்து வருகிறது! மெய்தேயி, குகி மற்றும் நாகோ சமூகத்தினர் பழைய பிரச்சினைகளை ஒதுக்கிவிட்டு மீண்டும் ஒற்றுமையாக வாழ முடியும் என்ற கனவும் தற்போது எரிந்து சாம்பலாகி வருகிறது. ஒருமித்த சமூக நம்பிக்கை குறைந்துள்ள நிலையில், நம்பிக்கையின்மை தான் எங்கும் நிறைந்திருக்கிறது. உண்மை என்னவெனில், இந்தியாவின் வடகிழக்கு மாநிலமான மணிப்பூரில் இரு சமூகங்களுக்குள் எழுந்த ஜாதிப் பிரச்சினை கடந்த ஒன்றரை மாதங்களாக நீடித்து வருகிறது. தொடர்ந்து பதற்றமும் நிலவிவருகிறது. 

பிரச்சினை என்ன?

மெய்தேயி மற்றும் குகி சமூகங்களுக்கு இடையே நடந்து வரும் சண்டையில் இதுவரை நூற்றுக்கும் மேற்பட்ட பொதுமக்கள் உயிரிழந்த நிலையில், 390 பேர் காயமடைந்துள்ளனர். இருப்பினும் இந்த வன்முறைகள் இன்னும் முடிவுக்கு வரவில்லை என்பதுதான் வேதனை! ‘ஏழு சகோதரிகள்' என்று வருணிக்கப்பட்ட வடகிழக்கு மாநிலங்களில் ஒன்றான மணிப்பூரில் உள்ள மெய்தேயி சமூகத்தினர் அவர்களை பழங்குடியின மக்களாக அறிவிக்க வேண்டும் என பல ஆண்டுகளாக கோரிக்கை விடுத்து வருகின்றனர். இந்தக் கோரிக்கைதான். இப் பொழுதுள்ள முக்கிய பிரச்சினை.