മഹാദേവ പൂജയിലൂടെ ശാപമോക്ഷം ലഭിച്ച ഗന്ധർവ്വൻ

ഉറക്കത്തിനിടയിൽ രാജാവിന്റെ സ്വപ്നത്തിൽ ശിവഭഗവാൻ പ്രത്യക്ഷപ്പെട്ടു പറഞ്ഞു.

- സംഗീത മധു

ഒരിക്കൽ ഒരു ഗന്ധർവ്വൻ അപ്സരകന്യകകൾക്കൊപ്പം നീരാടിക്കൊണ്ടിരിക്കുകയായിരുന്നു. അപ്പോഴാണ് അതുവഴി നാരദമുനി വന്നത്. നാരദനെ കണ്ടയുടനെതന്നെ കുളത്തിൽ നിന്നും ഭയഭക്തി ബഹുമാനത്തോടെ കരകയറാൻ കന്യകമാർ ശ്രമിച്ചു. പക്ഷേ, ഗന്ധർവ്വൻ അവരെ അതിന് അനുവദി ക്കാതെ തടഞ്ഞു നിർത്തുകയും ജലക്രീഡ തുടരുകയുമാണ് ചെയ്തത്. അത് ഗന്ധർവ്വൻ നാരദനെ പരോക്ഷമായി അപമാനിക്കുന്നതിന് തുല്യമായിരുന്നു. അത് ബോധ്യപ്പെട്ട നാരദൻ ഗന്ധർവ്വനെ ശപിച്ചു.

"ഗന്ധർവ്വാ, നീ ഉയർന്ന സ്ഥാനം അലങ്കരിക്കുന്നവനാണ്. അങ്ങനെയുള്ളവർ ഉത്തരവാദിത്തത്തോടുകൂടിയാണ് കാര്യങ്ങൾ പ്രവർത്തിക്കേണ്ടത്. അത് പാലിക്കാതെ മര്യാദകേട് കാട്ടുകയും ബാലിശമായ പ്രവൃത്തി ചെയ്യുകയും ചെയ്ത നീ ഒരു കുയിലായി തുടർ ജീവിതം നയിക്കാൻ ഇടവരട്ടെ.

ചെയ്ത തെറ്റ് മനസ്സിലാക്കിയ ഗന്ധർവ്വൻ ശാപമോക്ഷത്തിനായി പ്രായശ്ചിത്തത്തോടെ നാരദനോട് മാപ്പിരന്നു. അതുകേട്ട നാരദന്റെ മനസ്സലിയുകയും കാട്ടിലും മലകളിലും പല നാടുകളിലും അലഞ്ഞശേഷം നീ കാശി വിശ്വനാഥനെ പ്രാർത്ഥിക്കുക, ശാപവിമോചിതനാകും എന്ന് അനുഗ്രഹിക്കുകയും ചെയ്തു.