മൂക്കുതലയിലെ ആൽമരച്ചോട്ടിൽ

നാട്ടുപുരാവൃത്തങ്ങൾ നിറയുന്ന, ക്ഷേത്രവും വനവും അതിരിട്ടുനിൽക്കുന്ന സമ്മോഹനമായ പ്രകൃതിയാണ് മൂക്കുതലയെ വ്യത്യസ്തമാക്കുന്നത്

- SREELAL AG

എത്ര നേരം ആ  തണലിലിരുന്ന്ന് ഒരു പിടിയുമില്ല. പേരാലിന്റെ ഇലകൾ അരയാലിന്റെ ഇലകളെപ്പോലെയല്ല; പൊതുവെ ശാന്തരാണ്. അവ ഒരുപാട് ശബ്ദമുണ്ടാക്കി ചുറ്റുമുള്ളവരുടെ ശ്രദ്ധയാകർഷിക്കില്ല. മറിച്ച് നിശ്ശബ്ദരായി, അല്ലെങ്കിൽ പതിഞ്ഞ ശബ്ദത്തോടെ തങ്ങളുടെ തണലിലിരിക്കുന്നവരുടെ സംസാരം ശ്രവിക്കുക മാത്രമേ ചെയ്യൂ. സൂര്യനോട് പിണങ്ങി എതിർദിശയിലേക്ക് പതിയെ നീങ്ങിയിരുന്ന ആ വലിയ തണലിലേക്ക് ഒരുപാട് പേർ വരികയും പോവുകയും ചെയ്യുന്നുണ്ട്. വെറുതെ വെടിപറയാനെത്തിയവർ, ഓട്ടത്തിനിടയിലെ വിശ്രമത്തിനായി വന്ന ഡ്രൈവർമാർ, പൊരിവെയിലിൽ നിന്നല്പം ആശ്വാസം തേടിയെത്തിയ കൊറിയർ ഡെലിവറിക്കാർ, ഒറ്റയ്ക്ക് വന്നിരുന്ന് സന്തോഷം കണ്ടെത്തുന്ന ഏകാകികൾ, ഫോൺ ചെയ്യാനെത്തുന്ന കാമുകന്മാർ... അങ്ങനെ പോവുന്നു ആ നിര.

കണ്ണേങ്കാവ് ക്ഷേത്രാംഗണത്തിലുള്ള ആൽമരമാണിത്. ഗ്രാമമധ്യത്തിലുള്ള വലിയ ആൽമരത്തിന് തീർച്ചയായും ഒരുപാട് കഥകൾ പറയാനുണ്ടാവും, ഒരുപാട് തലമുറകളുടെ കഥകൾ. മനുഷ്യനും പ്രകൃതിയും തമ്മിലുള്ള ബന്ധത്തിന് മനുഷ്യകുലത്തോളം തന്നെ പഴക്കമുണ്ടല്ലോ!

 കോഴിക്കോട്-തൃശ്ശൂർ റൂട്ടിൽ ചങ്ങരംകുളത്തിന് മൂന്നു കിലോമീറ്റർ അകലെയുള്ള ഗ്രാമമാണ് മൂക്കുതല, "മുക്തിസ്ഥല' എന്ന സംസ്കൃതനാമത്തിൽ നിന്നും ഉരുത്തിരിഞ്ഞതാണ് മൂക്കു തല എന്ന് കരുതപ്പെടുന്നു. തെക്കുംമുറി, വടക്കുംമുറി, കാഞ്ഞിയൂർ എന്നീ ദേശങ്ങളുടെ സംഗമസ്ഥാനത്താണ് ക്ഷേത്രമുള്ളത്. മുക്കവല എന്നത് ലോപിച്ചാവാം മൂക്കുതല ഉണ്ടായതെന്നും പറയപ്പെടുന്നു. പുരാതനമായ മൂന്ന് ക്ഷേത്രങ്ങൾ അടുത്തടുത്തായി ഇവിടെ സ്ഥിതിചെയ്യുന്നു. മേലേക്കാവ്, കീഴേക്കാവ്, കണ്ണേങ്കാവ് എന്നീ ക്ഷേത്രങ്ങളാണവ.