കുടിയേറി 'പണിതന്നവർ'

കുടിയേറ്റം നടത്തുന്നത് മനുഷ്യർ മാത്രമല്ല. ഒരുനാട്ടിൽനിന്ന് മറ്റൊരു നാട്ടിലേക്ക് മൃഗങ്ങളെകൊണ്ടുപോകുന്നത് പുതിയതരം കുടിയേറ്റത്തിന് വഴിതെളിക്കുന്നു

-  ANJANA SASI

മയക്കുമരുന്ന് തലവനായിരുന്ന പാബ്ലോ എസ്കോബാറും ഹിപ്പോപ്പൊട്ടാമസുകളും തമ്മിലെന്ത് ബന്ധം? കേൾക്കുമ്പോൾ ആശ്ചര്യം തോന്നിയേക്കാം. എന്നാൽ, എസ്കോബാറിന് സ്വന്തമായി ഹിപ്പോകളുണ്ടായിരുന്നു എന്നതാണ് സത്യം. 1980-ലാണ് പാബ്ലോ എസ്കോബാർ നാല് ഹിപ്പോകളെ എസ്റ്റേറ്റിലേക്ക് കൊണ്ടുവന്നത്. 30 വർഷത്തിനുള്ളിൽ അവ 130 എണ്ണമായി പെരുകി. 1991-ൽ എസ്കോബാർ കീഴടങ്ങിയതോടെ സർക്കാർ എസ്റ്റേറ്റ് പിടിച്ചെടുത്തു. മധ്യ കൊളംബിയയിലെ മഗ്ദലീന നദിയിലാണ് ഇപ്പോൾ ഇവയുടെ താമസം. നിലവിൽ പ്രദേശത്തെ മണ്ണും വെള്ളവും ഇവർ മലിനമാക്കുന്നുവെന്നതാണ് ഇപ്പോഴത്തെ ഭീഷണി.

2022 സെപ്റ്റംബർ 17. നമീബിയയിൽ നിന്ന് കുതിച്ചുയർന്ന ബി-747 ജംബോജെറ്റ് വിമാനം മധ്യപ്രദേശിലെ ഗ്വാളിയോറിൽ പറന്നിറങ്ങി. അതിലുണ്ടായിരുന്നത് ഇന്ത്യയുടെ അതിഥികളായിരുന്നു. ബന്ധുക്കളൊന്നു പോലും അവശേഷിക്കാത്ത ഒരു രാജ്യത്തേക്ക്, പുതിയ ബന്ധങ്ങൾ സ്ഥാപിക്കാനെത്തിയ എട്ട് ചീറ്റകൾ. ലോകത്ത് ആകെ അവശേഷിക്കുന്ന ഏഴായിരത്തിൽ താഴെ വരുന്ന ചീറ്റകുടുംബത്തിലെ അംഗങ്ങൾ. അഞ്ച് പെൺചീറ്റകളും മൂന്ന് ആൺചീറ്റകളും. വംശമറ്റുപോയ ചീറ്റകൾ ഏഴ് പതിറ്റാണ്ടിന് ശേഷം വിരുന്നുകാരായെത്തി. അധികം താമസിയാതെ 2023 ഫെബ്രുവരിയിൽ 12 പേർകൂടി ഇവർക്കൊപ്പം വിരുന്നിനെത്തി. ഇന്നിപ്പോൾ നമുക്ക് 20 ചീറ്റകൾ സ്വന്തമായുണ്ട്. ആഫ്രിക്കൻ ചീറ്റകൾ ആണെന്ന് മാത്രം. ഏഷ്യൻ ചീറ്റ ഇറാനിൽ മാത്രമാണ് ഇനി ബാക്കിയുള്ളത്. വിദേശത്തുനിന്ന് കടന്നുവരുന്നവരിൽ മര്യാദക്കാരും ഭീകരൻമാരുമുണ്ട്.

മനുഷ്യ മുയൽ യുദ്ധം

ഏതാണ്ട് ഒരു നൂറ്റാണ്ട് നീണ്ടുനിന്ന മനുഷ്യ-മുയൽ പോരാട്ടത്തിന്റെ കഥ പറയാം. 1859-ൽ ബ്രിട്ടീഷുകാരനായ തോമസ് ഓസ്റ്റിൻ ഓസ്ട്രേലിയയിലെത്തി കൃഷിചെയ്യാൻ തീരുമാനിച്ചു. വിക്ടോറിയയിൽ ഏക്കറുകണക്കിന് ഭൂമി അദ്ദേഹം സ്വന്തമാക്കി. വേട്ടയാടലായിരുന്നു ഓസ്റ്റിന്റെ ഇഷ്ടവിനോദം. അതിനായി 24 കാട്ടുമുയലുകളെ ഓസ്റ്റിൻ കൃഷിഭൂമിയിലെത്തിച്ചു. ഒരുകാലത്ത് ഓസ്ട്രേലിയയിൽ മുയലുകൾ എണ്ണത്തിൽ കുറവായിരുന്നു.