આખરે દિલનો મામલો છે

હૃદયની હેલ્થ માટે કઈ વાતને ધ્યાનમાં રાખવી જરૂરી છે, એક વાર અચૂક જાણો..

આપણું નાનકડું હૃદય આપણા શરીરનો ઊર્જા સ્રોત છે. હૃદય કામ કરી રહ્યું છે તો આપણે જિંદગી જીવી રહ્યા છીએ. આપણું હૃદય લગભગ રોજ ૧ લાખ ૧૫ હજાર વાર ધબકે છે અને લગભગ ૨ હજાર ગેલન રક્ત પંપ કરે છે. જે દિવસે આ હૃદયમાં તકલીફ શરૂ થઈ તો તકલીફ તમને જ થશે. આપણા દેશમાં થતા મૃત્યુનું મુખ્ય કારણ હૃદય સંબંધિત બીમારી જ છે. હૃદયરોગના લીધે માત્ર ૨૫ વર્ષની ઉંમરમાં મૃત્યુના આંકડામાં ૩૪ ટકાનો વધારો થયો છે. તેથી તેનું ખાસ ધ્યાન રાખવું જરૂરી છે.

હૃદયની તંદુરસ્તી તમારા મગજ, તમારી ખાણીપીણી અને જીવનશૈલી સાથે જોડાયેલી હોય છે. તમે શું વિચારો છો, શું ખાઓ છો અને કેવી રીતે જીવો છો આ બધાની સીધી અસર હૃદયની હેલ્થ પર થાય છે.

આવો જાણીએ, હૃદયને સ્વસ્થ કેવી રીતે રાખી શકાય :

સક્રિયતા જરૂરી

એક નિષ્ક્રિય જીવનશૈલી જીવવાનો અર્થ છે પોતાના હૃદયની હેલ્થ જોખમમાં મૂકવી, તેથી આળસ છોડીને દોડો, વોક કરો, સાઈક્લિંગ અને સ્વિમિંગ કરો. જિમ જવું જરૂરી નથી, પણ શરીરને થાક લાગવો અને પરસેવો થવો જરૂરી છે. કોઈ પણ એવી એક્ટિવિટી, જેમાં તમારા પૂરા શરીરની એક્સર્સાઈઝ થાય. નિયમિત એક્સર્સાઈઝ કરવાથી હૃદયની બીમારીનું જોખમ ઓછું રહે છે.

ધૂમ્રપાન ન કરો

તમે સ્વયંને હૃદયરોગથી દૂર રાખવા માંગો છો તો જરૂરી છે કે આજે જ ધૂમ્રપાન બંધ કરો. ધૂમ્રપાન અને તમાકુનું સેવન કોરોનરી હૃદયરોગ થવાના સૌથી મોટા કારણમાંથી એક છે. તમાકુ રક્તવાહિની અને હૃદયને મોટું નુકસાન પહોંચાડે છે, તેથી જો તમારે હૃદયને સ્વસ્થ રાખવું છે તો આજે જ ધૂમ્રપાન છોડી દો.

વજન કંટ્રોલમાં રાખો

વધારે વજન હૃદયરોગ માટે જોખમકારક માનવામાં આવે છે, તેથી રોજ એક્સર્સાઈઝ કરવી અને સંતુલિત આહાર લેવો ખૂબ જરૂરી છે. સ્થૂળતાના લીધે હૃદયની સમસ્યા વધારે થાય છે.

જીવન ખુશનુમા જીવો

જીવન સામે ફરિયાદ ઓછી કરો અને ખૂલીને જીવવાનો પ્રયાસ વધારે કરો. રોજિંદા જીવનમાં નાનીનાની વસ્તુનો આનંદ માણો. તેનાથી હૃદય પણ ખુશ રહેશે અને તમે પણ. હસતા રહો. સંગીત સાંભળો, પુસ્તકો વાંચો, મિત્રો અને બાળકો સાથે સમય વિતાવો.

શરીરમાં ઓક્સિજનનું વધારે પહોંચે તે માટે ઊંડા શ્વાસ લો. આ તમામ ટેવ તાણને ઓછી કરવામાં મદદ કરશે અને તમને હૃદયની બીમારીથી દૂર રાખશે.