வாழ்க்கை ரகசியம்!

"இரு உடல்கள், ஒரே ஆன்மாவாக இருந்த நகுலும் கிரணும் ஒரு நாள் பிரிந்தனர். அதற்குக் காரணம் என்ன அவர்களின் வாழ்க்கையில் அப்படி என்ன நடந்தது?"

- மு. கண்ணன்

இன்று அலுவலக வேலைகள் சீக்கிரம் முடிந்து விட்டதால் நகுல் ஹோட்டலுக்கு செல்லாமல் நேராக கடற்கரைக்கு வந்தான். புகழ் பெட்ரா கடற்கரையின் பெருமைகளை கேள்விப்பட்டிருந்தான். இங்கு வந்தவுடன் ஒரு விசித்திரமான அமைதியை உணர்ந்தான். மக்கள் கூட்டத்திலிருந்து விலகி ஒரு ஓரமாக அமர்ந்து அலைகள் வருவதையும் போவதையும் ரசித்து பார்க்க ஆரம்பித்தான். மனம் நிம்மதியாக இருந்ததை அவனால் வெளியில் விவரிக்க முடியவில்லை.

அவனை தடுக்க இங்கு யாருமே கிடையாது. தலையில் தட்டிக் கேட்கும் அளவுக்கு யாரும் இல்லை என்பதுதான் மிகப் பெரிய விஷயம். இங்கே அவனும், தனிமையும் மட்டுமே இருந்தது. இப்படியே இன்னும் கொஞ்ச நாட்கள் இங்கேயே இருக்க மனம் விரும்பியது. அதுமட்டுமல்ல தன் வாழ்நாள் முழுவதையும் அங்கேயே கழித்தாலும் பிரச்சனை இல்லை என்ற அளவுக்கு அவன் எண்ணினான்.