നൂൽ ആർട്ട് എന്ന ഹൂപ്പ് എംബ്രോയ്ഡറി

നൂൽകൊണ്ട് അത്ഭുതം സൃഷ്ടിക്കുന്ന വയനാടുകാരി അമൃതപ്രിയയുടെ വിശേഷങ്ങൾ...

- നിരഞ്ജനാ ഇന്ദു

ഓരോ മുഖങ്ങളും നൂൽ കൊണ്ട് നെയ്തെടുക്കുന്ന വയനാടുകാരിയായ അമൃതയെ തേടി ഇന്ത്യൻ ബുക്ക് ഓഫ് റെക്കോർഡ് എത്തി. “ഹൂപ് എംബ്രോയ്ഡറി' എന്ന വാക്കിനെക്കാൾ തനിക്ക് ചുറ്റുമുള്ളവർക്ക് പെട്ടെന്ന് മനസ്സിലാവാൻ വേണ്ടിയാണ് അതിന് "നൂൽ ആർട്ട്' എന്ന പേര് അമൃത നൽകിയത്. വെറുതെ ഒരു നേരം പോക്കിന് വേണ്ടി തുടങ്ങിയതാണെങ്കിലും നൂൽ ആർട്ട് ഇപ്പോൾ അമൃതയുടെ ജീവിതത്തിന്റെ ഭാഗമാണെന്ന് പറഞ്ഞു കൊണ്ട് സംസാരിച്ചുതുടങ്ങി..

ആദ്യം അനിയത്തിയുടെ മുഖം തുന്നി

ചെറുപ്പം മുതൽ വരയ്ക്കാനുള്ള കഴിവുണ്ടങ്കിലും മത്സരങ്ങളിലൊന്നും പങ്കെടുക്കാത്തതു കൊണ്ട് അടുത്തു നിൽക്കുന്ന ചുരുക്കം ആൾക്കാർക്ക് മാത്രമേ ഞാൻ വരയ്ക്കുന്ന കാര്യം അറിയുകയുള്ളൂ. വീട്ടിലെ ചുമരുകളായിരുന്നു എന്റെ ക്യാൻവാസ്. വളരെ യാദൃച്ഛികമായി ഒരു സുഹൃത്തിന്റെ സ്റ്റാറ്റസ് കണ്ടാണ് ഹൂപ്പ് എംബ്രോയ്ഡറിയെ കുറിച്ച് അറിയുന്നത്. വെറുതെയൊന്ന് പരീക്ഷിക്കാമെന്ന് കരുതുകയായിരുന്നു. ആ സമയത്ത് അനിയത്തിയുടെ പിറന്നാൾ ആയതുകൊണ്ട് ഒരു ഗ്രൂപ്പിൽ അവളുടെ മുഖം തുന്നിപ്പിടിപ്പിച്ചു നൽകി. അത് എല്ലാവർക്കും ഇഷ്ടമായി. അങ്ങനെയാണ് ആദ്യത്തെ വർക്ക് നടക്കുന്നത്. സ്വന്തം അനിയത്തി തന്നെയാണ് ആദ്യത്തെ ക്ലയന്റ്.