ബംഗാളിൽ നിന്നൊരു മലയാളി സംരംഭക

ബംഗാളിൽ പഠനം. തുടർന്ന് ബിസിനസ്.. ആര്യശ്രീ കെ.എസ് പറയുന്നു

- ബിന്ദു പി.പി

എനിക്ക് പഠിക്കാനും ജീവിക്കാനുമുളള വഴി കണ്ടെത്തേണ്ടത് ഞാനെന്ന ബോധ്യം തന്നെയാണ് എന്നെയൊരു സംരംഭകയാക്കിയത്. പാഷനായ കരിയറിൽ നിൽക്കാൻ പലർക്കും സാധിക്കാറില്ല. ഈ വരയൊക്കെ ഒരു കരിയറാണോ എന്ന് ചോദിക്കുന്നവരുടെ ഇടയിൽ നിന്ന് അത് പ്രൊഫഷനാക്കി മുന്നോട്ടുപോവാൻ സാധിച്ചു. കലാപരമായ എല്ലാ കഴിവുകളും ഒഴിവു വേളകളിൽ സമയം കളയാനായി മാത്രം ഉപയോഗിക്കുന്നവയാണെന്നതാണ് പൊതുവെയുള്ള പലരുടെയും കാഴ്ചപ്പാട്. ഓരോ കുട്ടികളുടെയും കഴിവ് മനസ്സിലാക്കി അവർക്ക് കൃത്യമായി വഴികാണിച്ചുകൊടുക്കുന്നവരുടെ എണ്ണമെല്ലാം വളരെ കുറവാണ്. ഞാൻ എന്തായി തീരണമെന്നത് എന്റെ മാത്രം തീരുമാനമായിരുന്നു. ആ ദൃഢനിശ്ചയം തന്നെയാണ് എന്നെ ഇവിടെ എത്തിച്ചതെന്ന വിശ്വാസമുണ്ട്.

കേരളത്തിലേക്ക് ജോലി തേടി ബംഗാളികൾ ഒഴുകുമ്പോഴായിരുന്നു ബംഗാളിൽ തന്റെ തൊഴിൽ കണ്ടെത്തി മലയാളി പെൺകുട്ടി ആര്യശ്രീയുടെ തുടക്കം. ബംഗാളിൽ താമസിക്കുന്ന തൃശൂർക്കാരി എന്ന ടാഗ് ലൈനോട് ബംഗാളി മല്ലുവാലയായി സോഷ്യൽ മീഡിയ ഇടങ്ങളിൽ തിളങ്ങുകയാണ് ആര്യശ്രീ. തന്റെ ബംഗാൾ ജീവിതവും ബിസിനസ് വിശേഷങ്ങളും ആദ്യമായി പങ്കുവയ്ക്കുകയാണ് ആര്യ ശ്രീ.

ബംഗാൾ എന്ന സ്വപ്നഭൂമി

തൃശൂർ ഫൈൻ ആർട്ട്സ് കോളേ ജിൽ ബി.എഫ്. എ ചെയ്തു. പഠനഭാഗമായുള്ള ഓൾ ഇന്ത്യ ടൂറിൽ എം.എ ഫ്.എയുള്ള ക്യാമ്പസുകളിലും വിസിറ്റ് ചെയ്തിരുന്നു. അങ്ങനെയാണ് ആദ്യമായി വിശ്വഭാരതി യൂണിവേഴ്സിറ്റി ക്യാമ്പസ്സിനെക്കുറിച്ച് അറിയുന്നത്.