ഒരുക്കാം, സ്നേഹസന്ദേശങ്ങളുടെ പുൽക്കൂട്

എങ്ങും നക്ഷത്രവിളക്കുകൾ തെളിഞ്ഞു തുടങ്ങി

- നാസർ മുഹമ്മദ്

എങ്ങും നക്ഷത്രവിളക്കുകൾ തെളിഞ്ഞു തുടങ്ങി. സന്തോഷത്തിന്റെയും ആഘോഷത്തിന്റെയും ദിനമായ ക്രിസ്തുമസിനെ വരവേൽക്കാൻ ലോകം തന്നെ ഒരുങ്ങുകയായി.

വഴിയോരങ്ങളെല്ലാം അലങ്കാര വിളക്കുകൾ കൊണ്ട് അലങ്കരിച്ചും ക്രിസ്മസ് വിപണി ലക്ഷ്യമാക്കി തെരുവുകളെല്ലാം ആവേശത്തിലാണ്. വീടുകളിൽ പുൽക്കൂടും നക്ഷത്രങ്ങളും അലങ്കാരവിളക്കുകളും ക്രിസ്മസ് ട്രീയുമൊക്കെയായി ഉണ്ണിയേശുവിനെ വരവേൽക്കാൻ ഒരുങ്ങുന്ന വേളയിൽ “മഹിളാരത്നവും വായനക്കാരുടെ സന്തോഷത്തിൽ പങ്കുചേരുകയാണ്.

കോവളം സമുദ്ര ബീച്ച് റോഡിലെ മോളീസ് റിട്രീറ്റിൽ മനോഹരമായ പുൽക്കൂട് ഒരുക്കുന്ന തിരക്കിലാണ് റീസും ജിബിയയും തൻമയയും കുഞ്ഞായ അൻഹാഫാത്തിമയും.

കന്യാമറിയത്തിനും ജോസഫിനും പരിശുദ്ധാത്മാവിന്റെ കടാക്ഷത്തിൽ ജനിച്ച മകനാണ് യേശുവെന്നാണ് ബൈബിളിൽ പറയുന്നത്. ലോകത്തെ രക്ഷിക്കാൻ ഒരു ദൈവപുത്രൻ പിറക്കുന്നുണ്ടെന്നും അവനെ എന്ന് വിളിക്കണമെന്നും ഉണ്ണിയേശുവിന്റെ ജനനത്തെക്കുറിച്ച് മാലാഖ പ്രവചിച്ചിരുന്നു. കാലിത്തൊഴുത്തിൽ പിറന്ന ദൈവപുത്രനെ കാണുവാൻ ആദ്യമെത്തിയത് ആട്ടിടയൻമാരായിരുന്നു. ആട്ടിടയന്മാരുടെ രൂപങ്ങൾ പുൽക്കൂടിൽ വയ്ക്കുന്നതിനിടയിലാണ് റീംസ് അത് പറഞ്ഞത്. റീംസിനെ പരിചയപ്പെടുത്താം. യൂ ട്യൂബറും ഇൻഫ്ളുവൻസറും ബിസിനസ്സുകാരിയുമാണ്. കഴക്കൂട്ടത്തിനടുത്തുള്ള സെന്റ് ആൻഡ്രൂസ് ഗ്രാമത്തിലെ സിറിൾ ആഞ്ചലോസ് ഗോമസിന്റെയും മേരിക്കുട്ടി സിറിളിന്റെയും മകൾ.

ചേച്ചീ... മഞ്ഞിന്റെ കുളിരും നക്ഷത്രങ്ങളുടെ തിളക്കവും പുൽക്കൂടിന്റെ പുതുമയും പാതിരാക്കുർബാനയുടെ പവിത്രതയും പറഞ്ഞാലും പറഞ്ഞാലും തീരാത്ത ദിനമാണല്ലോ ക്രിസ്മസ്. പുൽക്കൂടിലെ അലങ്കാര വിളക്കുകൾ തെളിയിച്ച് ജിബിയ പറഞ്ഞു.

രാഗേഷ് നാരായണൻ സംവിധാനം ചെയ്ത തണുപ്പ് എന്ന ചിത്രത്തിലെ നായികയാണ് ജിബിയ. കണ്ണൂർ സ്വദേശി.

മോളൂ.. ഒന്ന് ചിരിച്ചെ ...പുൽക്കൂടിന് മുന്നിലിരുന്ന അൻഹാഫാത്തിമയെ നോക്കി തൻമയ പറഞ്ഞു. എല്ലാവരും അൻഹയെ നോക്കി ചിരിച്ചു. അങ്ങനെ മനോഹരമായ ഒരു സെൽഫി പിറന്നു.

2022 ലെ മികച്ച ബാലതാരത്തിനുള്ള സംസ്ഥാന അവാർഡ് ലഭിച്ച തൻമയ, രജനികാന്തിനും അമിതാഭ്ബച്ചനും മഞ്ജുവാര്യർക്കുമൊപ്പം വേട്ടയ്യനിലൂടെ വീണ്ടും പ്രേക്ഷകർക്ക് മുന്നിലെത്തി. ക്യാമറാമാനും നടനുമായ അരുൺ സോളിന്റേയും ആശയുടേയും മകളായ തൻമയ സോൾ പട്ടം ഗേൾസ് സ്ക്കൂളിലെ ഒൻപതാം ക്ലാസ് വിദ്യാർത്ഥിനിയാണ്.