പാഷൻ പ്രൊഫഷൻ ആക്കി അഞ്ജലി!

ഡോഗ് ട്രെയ്നിംഗിലൂടെ ലക്ഷങ്ങൾ വരുമാനം സമ്പാദിക്കുകയും, സമൂഹമാധ്യമങ്ങളിൽ ഏറെ ആരാധകരെ സൃഷ്ടിക്കുകയും ചെയ്ത അഞ്ജലി സംസാരിക്കുന്നു

- രജനീകൃഷ്ണ

പട്ടി ഉണ്ട് എന്ന് കേൾക്കുമ്പോൾ തന്നെ പേടിച്ചോടുന്നവർ ആണ് ഒട്ടുമിക്ക മലയാളികളും. നായ്ക്കുട്ടികളെ വളർത്തുകയും പരിപാലിക്കുകയും ചെയ്യുന്നത് ഈർഷ്യയോടെ കാണുന്നവരും നമുക്കും ചുറ്റുമുണ്ട്. എന്നാൽ, അഭിമാനത്തോടെ പറയട്ടെ ഇന്ന്, എന്റെ ജീവിതവും വരുമാനവും എല്ലാം നായകൾ സമ്മാനിച്ചത് ആണ്.

സിവിൽ സർവ്വീസ് ചെയ്യണം എന്നായിരുന്നു സ്വപ്നം കണ്ടത്. അതിനിടയിൽ ആണ് വീട്ടിൽ ഞങ്ങൾ ഒരു നായ്ക്കുട്ടിയെ വാങ്ങുന്നത്. പണ്ട് അച്ഛൻ സമ്മാനിച്ച് വളർത്തുനായയുടെ പേരാണ് ഞാൻ ഇട്ടത്. ജിക്കി, ഒരു വിധേനയും മൃഗപരിപാലനം അറിയാത്ത ഞാൻ ലാബ്രഡോർ റിട്രീവർ ഇനം ആയ ജിക്കിക്ക് വേണ്ടിയാണ്, യൂ ട്യൂബിലൂടെ ഡോഗ് ട്രെയിനിംഗ് പഠിക്കുന്നത്. അതിന്റെ ഭക്ഷണരീതികളും, സ്വഭാവസവിശേഷതയും, നായകളെ മെരുക്കുന്ന രീതികളും എനിക്ക് പുതിയ അനുഭവങ്ങൾ ആയിരുന്നു. നമ്മൾ പറയുന്നതു പോലെ ജിക്കി അനുസരിക്കുകയും നമ്മുടെ വിഷമത്തിലും സന്തോഷത്തിലും നായ കൂടിച്ചേരുന്നതും എല്ലാം എന്നെ സംബന്ധിച്ച് സന്തോഷം നൽകുന്നതാണ് എന്ന് തിരിച്ചറിഞ്ഞു. അങ്ങനെ ആണ് ഒരു അധ്യാപകന്റെ അടുത്ത് ഡോഗ് ട്രെയിനിംഗ് ലൈസൻസ് എടുക്കാനും, സർട്ടിഫിക്കറ്റ് നേടാനുമുള്ള പഠനം തുടങ്ങുന്നത്. അങ്ങനെ ഒഫീഷ്യൽ ഡോഗ് ട്രെയിനർ ആയി ഞാൻ.