திருமணத்தில் புதுமை! தாம்பூலப் பையில் புத்தகங்கள்!!

"நான் இன்னும் வாசிக்காத நல்ல புத்தகம் ஒன்றை வாங்கி வந்து என்னை சந்திப்பவனே தலை சிறந்த நண்பன்' நாம் அனைவரும் நன்கு அறிந்த ஆபிரகாம் லிங்கன் கூறிய வார்த்தைகள் இவை.

- கீர்த்தி - தினேஷ்

இந்த உலகத்தில் வாழ்ந்த, வாழும் மாபெரும் தலைவர்கள் பலரும் புத்தக வாசிப்பின் மீது பேரார்வம் கொண்டவர்கள் தாம். வாசிப்பு என்பது மக்களின் அறிவிற்கான, சமூகப் புரிதலுக்கான திறவுகோல்.

இதனை நன்கு உணர்ந்த ஒரு காதல் தம்பதியினர், தங்கள் திருமணத்தில் தாம்பூலப் பைகளுக்குப் பதிலாக புதுமையான முறையில் புத்தகப் பைகளை வழங்கி அசத்தியுள்ளனர். அதுவும் வெறுமனே பேருக்காக ஒன்றிரண்டு புத்தகங்கள் அல்ல, 25 புத்தகங்கள் அடங்கிய 650 ரூபாய் மதிப்பிலான புத்தகப் பையினை, மிகப்பெரிய அறிவுக் களஞ்சியத்தை தங்கள் திருமணத்திற்கு வருகைப் புரிந்தவர்களுக்கு அன்பளிப்பாக வழங்கியுள்ளனர்.

இதில் மற்றொரு குறிப்பிடத் தகுந்தது, அந்த புத்தகங்கள் அனைத்துமே சமூக நீதி, மானுட சமத்துவம், வாழ்க்கைக்கான அறநெறி, பொதுவுடமை போன்ற நம் சமூகத்திற்கு தேவையான ஆழ்ந்த கருத்துகளை வலியுறுத்தும் சீரிய கருத்தியல் சார்ந்த புத்தகங்கள் ஆகும். இதற்காகவே பெரியார், அம்பேத்கர், சேகுவாரா, போன்ற பெருந்தலைவர்களின் புத்தகங்கள் இந்தப் பையில் பெரும்பான்மை இடத்தைப் பெற்றுள்ளன.