விமர்சனங்களை பக்குவமாக கையாளுவது எப்படி?

விமர்சனங்கள் வரவேற்கப்படுகின்றன என்ற இதழ்களில் தான் முன்பு போடுவார்கள். காரணம், தவறுகளை திருத்திக் கொள்வதற்காக. இயல், இசை, நாடகம் என அனைத்துத் துறைகளிலும் விமர்சனங்கள் முக்கிய பங்கு வகிக்கின்றன.

ஒரு மனிதனை விமர்சனம் புண்படுத்துவதாக எடுத்துக் கொள்ளக்கூடாது. அது பண்படுத்தும் என்பது தான் அனுபவப்பூர்வ உண்மை.

உங்களை யாரும் விமர்சனம் செய்யாமல் இருக்க வேண்டுமா? எதையும் செய்யாதீர்கள்; எதையும் பேசாதீர்கள்; ஒன்றுமே செய்யாமல் இருங்கள்!'

கொஞ்சம் கடுமையாகவே சொல்லியிருக்கிறார் அமெரிக்க எழுத்தாளரும் தத்துவவியலாளருமான எல்பர்ட் ஹப்பார்டு.

நீங்கள் செய்கிற வேலையில் யாராவது கண்டுபிடிக்கிறார்களா? அதற்காகக் கவலையேபடாதீர்கள். `நாம் வேலை செய்கிறோம்; செய்த வேலையில்தானே குறை சொல்கிறார்கள்' என்று திருப்திபட்டுக்கொள்ளுங்கள்.

அதற்காகத் திரும்பத் திரும்ப தப்பும் தவறுமாக ஒரு வேலையைப் பார்க்க வேண்டும் என்று அர்த்தப்படுத்திக்கொள்ளக் கூடாது. தவறுகளைக் களையவும், ஒரு செயல் மேம்பட உதவுவதும்தான் விமர்சனம். ஒரு நேர்மையான விமர்சகர், தனிநபர் தாக்குதலில் இறங்க மாட்டார்; அவருடைய விமர்சனம் படைப்பாளியின் திறமையை அடையாளம் காட்டுவதாக இருக்கும்; படைப்பாளி தன் திறமையை வளர்த்துக்கொள்ள உதவுவதாக இருக்கும்.

விமர்சனத்தை எதிர்கொள்வதற்குக்கூட ஒரு பக்குவம் தேவைப்படுகிறது. யாராவது நம்மை ஏதாவது சொல்லிவிட்டால் 'நான் யார் தெரியுமா, என்னைப் போய் குறை சொல்லலாமா?' என்கிற அளவுக்கு எகிறுகிறவர்களைப் பார்க்கிறோம்.

`நான் மட்டுமா தப்பு செய்யறேன்... மத்தவங்களும்தான் செய்றாங்க..' என்று அடுத்தவர் மேல் விரலை நீட்டுபவர்களும் இருக்கிறார்கள். நம்மை யாராவது விமர்சனம் செய்யும்போது அதன் உண்மைத் தன்மையை ஆராய வேண்டும். உண்மையிலேயே நம் மீது தவறு இருந்து, அதை ஒருவர் சுட்டிக்காட்டியிருந்தால் அதைக் களைய முன் வரவேண்டும். இது, இறங்கி வருவதல்ல; வளர்ச்சிப் பாதையில் மேலே மேலே போவதற்கான வழி.

இந்த எதார்த்தத்தை அடையாளம் காட்டுகிறது ஒரு மேதையின் வாழ்வில் நடந்த கதை.

அந்தச் சிறுவனுக்கு வயது ஐந்து. ஆனால், மேதை. அப்படித்தான் சொல்ல வேண்டும். பின்னே... அந்த வயதிலேயே அம்மா பாடுகிற அத்தனைப் பாடல்களையும் தன் கையிலிருக்கும் வயலினில் அட்சரம் பிசகாமல் அப்படியே இசைத்துவிடுகிறானே! அவனின் வயலின் இசையைக் கேட்டவர்களெல்லாம் மெய்மறந்து போனார்கள். அந்தச் சிறுவன் வேறு யாருமல்ல... 19ஆம் நூற்றாண்டில் வயலின் இசையில் தனி முத்திரை பதித்த உலே புல்.