ലഞ്ച് ബെല്ലടിച്ചു കയ്യിലെടുക്കാം ചോറ്റുപാത്രം

തിരുവനന്തപുരത്തു പ്രവർത്തിക്കുന്ന കേന്ദ്രീകൃത അടുക്കളയിൽ പാചകവും പാക്കിങ്ങും ചൂടാറാതെ നടക്കും

രാവിലെ തിരക്കിട്ടു പ്രഭാതഭക്ഷണമൊരുക്കി കുട്ടികളെ സ്കൂളിലേക്കു വിടാനും ഓഫിസിലേക്ക് ഓടിയെത്താനുമുള്ള നെട്ടോട്ടം. അതിനിടയിൽ ഉച്ചഭക്ഷണം ഒരുക്കുന്നതു പലർക്കും പ്രയാസമേറിയ കാര്യമാണ്.

സംസ്ഥാന തലസ്ഥാനത്ത് ഈ ഉച്ചഭക്ഷണത്തിന്റെ ഉത്തരവാദിത്തം ഇപ്പോൾ കുടുംബശ്രീ ഏറ്റെടുത്തു കഴിഞ്ഞു. കഴിഞ്ഞ രണ്ടു മാസമായി നാലായിരത്തോളം ഉച്ചയുണുകൾ ഓഫിസുകളിലും വീടുകളിലുമായി കുടുംബശ്രീ എത്തിച്ചിട്ടുണ്ട്. സ്റ്റീൽ പാത്രങ്ങളിൽ ചൂടോടെയാണ് ഉച്ചയൂണെത്തുന്നത്. കുടുംബശ്രീയുടെ ഓൺലൈൻ ആപ്പായ "പോക്കറ്റ് മാർട്ട്' വഴി ഓരോ ദിവസവും രാവിലെ ഏഴു മണിക്കു മുൻപ് ഭക്ഷണം ഓർഡർ ചെയ്യാം. മുൻകൂട്ടി ബുക്ക് ചെയ്യാനും സൗകര്യമുണ്ട്.