ഓൺലൈനിൽ വിരിഞ്ഞ നൃത്തമുദ്രകൾ

പ്രഫഷന്റെ തിരക്കും പ്രായവും പാഷനു തടസ്സമാകില്ലെന്നു തെളിയിക്കുകയാണ് ഈ വനിതകൾ

- ചൈത്രാലക്ഷ്മി

തിരക്കിട്ടു പായുന്നതിനിടയിൽ സ്വയം സ്നേഹിക്കൂയെന്നു ജീവിതം ഓർമപ്പെടുത്താറില്ലേ. അങ്ങനെയൊരു ഓർമപ്പെടുത്തലിലാണു പണ്ടെങ്ങോ മാറ്റി വച്ച മോഹത്തിന്റെ ചിലങ്കയണിയാൻ അവർ തീരുമാനിച്ചത്. ഡോക്ടർമാരായ നാലു മലയാളി വനിതകൾ ആ മോഹമുദ്രകളുമായി അരങ്ങിലെത്തി.

കോയമ്പത്തൂർ ശ്രീരാമകൃഷ്ണ ഡെന്റൽ കോളജ് ആൻഡ് ഹോസ്പിറ്റലിലെ എച്ച്ഒഡി ആൻഡ് പ്രഫസർ ഡോ. അഞ്ജന കുര്യൻ, യുകെയിൽ കൺസൽറ്റന്റ് ഹെഡ് ആൻ ഡ് നെക് ഓങ്കോ റേഡിയോളജിസ്റ്റ് ആയ ഡോ. ഉമ അരുൺരാജ്, യുകെയിൽ അഡിക്ഷൻ സൈക്യാട്രി വിഭാഗത്തിൽ ജോലി ചെയ്യുന്ന ഡോ. സിമി ആന്റണി, കോഴിക്കോ ട് കൊയിലാണ്ടി താലൂക്ക് ഹെഡ്ക്വാർട്ടേഴ്സ് ഹോസ്പിറ്റലിലെ കൺസൽറ്റന്റ് പീഡിയാട്രീഷനായ ഡോ. മഞ്ജു സദാശിവൻ എന്നിവരാണ് ഓൺലൈൻ പഠനത്തിലൂടെ ന്യത്തത്തിൽ അരങ്ങേറ്റം കുറിച്ചത്.

യുകെയിൽ ബാങ്കിങ് മേഖലയിൽ ജോലി ചെയ്യുന്ന മുംബൈ സ്വദേശി കിൽ സൗരഭ് ഷായും ഇവരോടൊപ്പം അരങ്ങേറ്റത്തിന്റെ ഭാഗമായി. ഈ അഞ്ചു പേരുടെയും നൃത്താധ്യാപികയായ ഈശ്വരി ഗോപകുമാർ ഓഡിയോളജിസ്റ്റ് ആൻഡ് സ്പീച് ലാംഗ്വേജ് പതോളജിസ്റ്റാണ്. പ്രൊഫഷനോടൊപ്പം പാഷനു വേണ്ടിയും സമയം കണ്ടെത്താമെന്നു തെളിയിക്കുകയാണ് ഈ അഞ്ചു വനിതകളും നൃത്താധ്യാപികയും.

ഓൺലൈനിൽ നിന്ന് അരങ്ങത്തേക്ക്