കഥയാണ് താരം.അന്നും ഇന്നും- വിജിതമ്പി

മാറ്റങ്ങൾ കൂടുതൽ സൗകര്യങ്ങളും അവസരങ്ങളും ഒരുക്കുന്നുണ്ട് എന്നത് യാഥാർത്ഥ്യം. എന്നാൽ സിനിമയുടെ പഴയ ഗൗരവസ്വഭാവം നഷ്ടമായോ എന്ന് സംശയ മുണ്ട്. ഇപ്പോൾ ഒരേസമയം, മൂന്നും നാലും ക്യാമറ വെച്ചാണ് ഷൂട്ട് ചെയ്യുന്നത്. എഡിറ്റിംഗിനെക്കുറിച്ചൊക്കെ ചിന്തിക്കു ന്നത് പിന്നീടാണ്. പണ്ട് അതായിരുന്നില്ല സ്ഥിതി- സംവിധായകൻ വിജിതമ്പി പറയുന്നു. മലയാളസിനിമയിൽ വന്നുഭവിച്ച മാറ്റങ്ങളെക്കുറിച്ചും സമകാലിക സാഹചര്യങ്ങളെക്കുറിച്ചും നാനയോട് സംസാരിക്കുകയായിരുന്നു അദ്ദേഹം.

- അനീഷ് മോഹനചന്ദ്രൻ

സുദീർഘമായ ഒരു ഇടവേള. താങ്കളെ അടുത്തിടെയായി ലൈംലൈറ്റിൽ കാണാറില്ലല്ലോ?

ഞാനിവിടെ തന്നെയുണ്ട്. സുഖം, സന്തോഷം അങ്ങനെ പോകുന്നു.

കുറച്ചുനാളായിട്ട് കൊച്ചിയിൽ ആയിരുന്നെന്ന് കേട്ടു

അതെ. മകൻ അവിടെ ആയിരുന്നു. അവനോടൊപ്പമായിരുന്നു കുറച്ചുനാളായിട്ട്. ഇപ്പോൾ അയാൾ ബംഗളൂരുവിലേക്ക് മാറി. അതോടെ ഞങ്ങൾ ഇങ്ങ് തിരുവനന്തപുരത്തേയ്ക്ക് പോന്നു.

പൂർണ്ണമായി കൊച്ചിയിൽ നിന്നും പറിച്ചുനട്ടു എന്നാണോ?

ഏയ്... അങ്ങനൊന്നുമില്ല. കൊച്ചിയിൽ ഓഫീസുണ്ട്. പിന്നെ കുടുംബക്കാരും സുഹൃത്തുക്കളുമൊക്കെ ഇവിടെയാണല്ലോ അധികവും.

പുലി പതുങ്ങുന്നത് ഒളിക്കാനല്ല കുതിക്കാനാണ് എന്ന് പറയുന്നതുപോലെ മലയാളത്തിലെ എണ്ണം പറഞ്ഞ മുതിർന്ന സംവിധായകരിൽ ഒരാളായ താങ്കൾ എന്തോ വലിയൊരു സംഗതിക്കായിട്ടുള്ള ഒരുക്കങ്ങളിലാണെന്ന് കേട്ടു

കേട്ടത് കുറച്ചൊക്കെ ശരിയാണ്. ഒരു ബിഗ് ബജറ്റ് പ്രോജക്ടിന്റെ പിന്നാലെയാണ്. ഏറെ ശ്രമകരമായ ഒരു ടാസ്ക്കാണത്. വെറുതെ അങ്ങ് ചെന്ന് എക്സിക്യൂട്ട് ചെയ്യാവുന്ന ഒരു സംഗതിയല്ല. അതിനായുള്ള പ്രവർത്തനങ്ങൾ വളരെ ശക്തമായിട്ട് മുന്നോട്ടു പോകുന്നു.

ബിഗ് ബജറ്റെന്ന് പറയുമ്പോൾ, ഒന്ന് വിശദമാക്കാമോ?

വേലുത്തമ്പി ദളവയുടെ ജീവിതത്തെ ആസ്പദമാക്കി ഒരു മെഗാ പ്രോജക്ടാണ്. പൃഥ്വിരാജ് നായകനായി എത്തുന്ന ചിത്രത്തിന്റെ സ്ക്രിപ്റ്റ് വർക്കെല്ലാം ഏറെക്കുറെ കഴിഞ്ഞു. രഞ്ജിപണിക്കരാണ് സ്ക്രിപ്റ്റ് എഴുതുന്നത്. വാസ്തവത്തിൽ ഇത് 2005 ൽ തുടങ്ങിയ വർക്കാണ്. ചരിത്രത്തിന്റെ ഭാഗമായ ഒരു ഏട് അഭ്രപാളിയിൽ പകർത്തുമ്പോൾ അതത്ര നിസ്സാരമായിരിക്കില്ലല്ലോ.

അതുകൊണ്ട് നല്ല രീതിയിൽ ഹോം വർക്ക് നടത്തി കുറേയധികം ഗവേഷണങ്ങളൊക്കെ ചെയ്തതിനു ശേഷമാണ് എഴുത്ത് ആരംഭിച്ചതുതന്നെ. പൃഥ്വിയെ മൂന്നോ നാലോ ഗെറ്റപ്പിൽ കൊണ്ടുവരേണ്ടതുണ്ട്. അതുകൊണ്ടുതന്നെ 100 ദിവസത്തിലധികം ഷൂട്ടിനായി തന്നെ വേണ്ടിവരും. പൃഥ്വിയുടെ തിരക്കു കാരണം അതങ്ങോട്ട് ഒത്തു വരുന്നില്ല. അതിനിടെ കോവിഡ് ഉൾപ്പെടെയുള്ള സംഗതികൾ പ്രതിസന്ധിയായി. ഏറ്റവും ഒടുവിൽ, എമ്പുരാന്റെ വർക്ക് കഴിഞ്ഞാൽ ചെയ്യാം എന്ന നിലയ്ക്കാണ് നിൽക്കുന്നത്.

ഇതിനിടെ മറ്റേതോ ഒരു പ്രോജക്ട് താങ്കളുടേതായി വരുന്നുണ്ടെന്ന് കേട്ടിരുന്നു