തിരുനെല്ലിയിലേക്കുള്ള യാത്രാവിശേഷങ്ങളിലൂടെ

തനിയെ അണിഞ്ഞൊരുങ്ങിയിട്ട് എന്റെ ചന്തം കണ്ടോ എന്ന് ഉള്ളിലിരു ന്ന് ആരോ ചോദിക്കുന്നതായി തോന്നി. പ്രകൃതിസൗന്ദര്യം ആസ്വദിക്കാൻ സ്വിറ്റ്സർലന്റ് വരെയൊന്നും പോയി മെനക്കെടേണ്ടെന്ന് സധൈര്യം ആരോടും പറയാനാവുംവിധമുള്ള സൗന്ദര്യമാണ് വഴിനീളേ ഞങ്ങൾ നുകർന്നത്.

- ഡോ. പി. കെ. ജയകുമാരി

നനവുള്ള ഓർമ്മകളോടെയാണ് ഞാൻ തിരുനെല്ലിയാത്രയുടെ വിശദാംശങ്ങൾ നിങ്ങളുമായി പങ്ക് വെയ്ക്കുന്നത്. ആഗസ്റ്റ് 17ന് ആകസ്മികമായുണ്ടായ എന്റെ ഭർത്താവിന്റെ വേർപാട്. മരണം മുൻകൂട്ടി കണ്ടത് പോലെ, മരണശേഷമുള്ള ആഗ്രഹങ്ങൾ അദ്ദേഹം മകനോട് പറഞ്ഞേൽപ്പിച്ചിരുന്നു. അതിലൊന്നാണ് അസ്ഥി തിരുനെല്ലിയിൽ ഒഴുക്കണമെന്നത്. ഞങ്ങളുടെ കുടുംബത്തിലെ മരണാനന്തരകർമ്മങ്ങൾ ആലുവായിലാണ് ചെയ്യാറുള്ളതെങ്കിലും, അച്ഛന്റെ ആഗ്രഹം നിറവേറ്റാമെന്ന് മക്കൾ തീരുമാനിച്ചു.

തിരുനെല്ലി ക്ഷേത്രത്തിൽ അന്വേഷിച്ചപ്പോൾ, ക്ഷേത്രത്തിൽ ബലിതർപ്പണം ചെയ്യാമെന്നും പക്ഷെ അസ്ഥി നിമജ്ജന പ്രക്രീയ ക്ഷേത്രം നടത്താറില്ലെന്നും, ക്ഷേത്രത്തിൽ ബലിതർപ്പണം ചെയ്തശേഷം, ക്ഷേത്രത്തിന് വെളിയിൽ നദിയുടെ ഒഴുക്കുള്ള ഭാഗത്ത് അസ്ഥിനിമജ്ജനം ചെയ്യാനുള്ള സൗകര്യമുണ്ടെന്നും ക്ഷേത്രഭാരവാഹികളിൽ നിന്നറിഞ്ഞു. അങ്ങനെയാണ് തിരുനെല്ലിയിലേക്കുള്ള യാത്ര പുറപ്പെടുന്നത്.

റബർത്തോട്ടങ്ങളും വാഴത്തോപ്പുകളും വൃക്ഷലതാദികളും കൊണ്ട് സമൃദ്ധിയായ സ്ഥലത്ത് കൂടെയുള്ള യാത്ര, ഉണങ്ങി വരണ്ട് ശുഷ്കിച്ചുപോയ എന്റെ ചിന്തക ളെ ഭൂമിദേവീ തന്റെ വരപ്രസാദത്തിലൂടെ വഴി തിരിച്ച് വിടുന്നതായി എനിക്കനുഭ വപ്പെട്ടു. നെൽവിത്തിനകത്ത് നിന്ന് പ്ര പഞ്ചത്തെ പുൽകാൻ ആകാംക്ഷയോടെ എത്തി നോക്കുന്ന പുത്തൻ നാമ്പുകൾ പോലെയായി എന്റെ ചിന്തകൾ. വനാന്തരങ്ങളിലുള്ള കലപില ശബ്ദമുണ്ടാക്കി പറക്കുന്ന പറവകളിലേക്കും,വൃക്ഷതലപ്പിലൂടെയും ശാഖകളിലൂടെയും വാനരന്മാർ ചാടി കളിക്കുന്നതും ഊഞ്ഞാലാടുന്നതുമായ കുസൃതികളിലേക്കും എന്റെ ശ്രദ്ധ ചെന്ന് പതിച്ചു.