சமூகத்தைக் காட்சிப்படுத்தும் மீனாசுந்தரின் 'புலன் கடவுள்'

நவீன இலக்கியங்களில் சிறுகதையானது தனக்கென ஒரு தனித்துவத்தைப் பெற்றுள்ளது.

- உடுமலை கி. ராம்கணேஷ்

கதைகளின் வழியாக இன்றைய வாழ்க்கை முறையின் பல்வேறு சிக்கல்கள் குறிப்பிடப்பட்டுள்ளன. யதார்த்த உலகைப் பிரதிபலித்து, வாசகரைக் கவரும் பல்வேறு உத்திகள் சிறுகதைகளில் கையாளப்படுகின்றன. உலகின் தலைசிறந்த சிறுகதைகள் பட்டியலில் தமிழ்மொழிச் சிறுகதைகளுக்கென தனிக்களம் உண்டு. அக்களத்தைச் சரிவரப் பயன்படுத்திக் கொண்டு களமாடுபவர்களுள் ஒருவராக எழுத்தாளர் மீனாசுந்தரைக் குறிப்பிடலாம். பத்துக்கும் மேற்பட்ட படைப்புகளை வெளியிட்டவர். பல்வேறு பரிசுகளையும் பாராட்டுகளையும் பெற்றவர். பொதினி இலக்கிய அமைப்பை உருவாக்கி, இலக்கியத்திற்கு வளம் சேர்த்தவர். அவருடைய படைப்புகளில் ஒன்றான 'புலன் கடவுள்' என்ற சிறுகதைத் தொகுப்பின் வழியாக மனித வாழ்க்கையின் பல்வேறு உணர்வுகளை வெளிக்காட்டியிருக்கிறார்.

மீனா சுந்தரின் படைப்பான 'புலன் கடவுள்' சிறுகதைத் தொகுப்பில் வரும் கதை மாந்தர்கள் செல்வக்கான குடும்பத்தில் பிறந்தவர்கள் அல்லர். பெரும்பாலும் ஒவ்வொரு நாளும் வாழ்வதற்கான உணவினைத் தேடிப்பெறும் அன்றாடங்காய்ச்சிகளாக நம்முன் வாழ்ந்து காட்டிக்கொண்டிருக்கிறார்கள். அவர்கள்தான் கதையின் இயக்கமாயிருக்கிறார்கள். நடுத்தர மக்களும் அடித்தட்டு மக்களும் யதார்த்த வாழ்க்கையில் எதிர்கொள்ளும் சவால்களை இவரது படைப்புகள் வெளிக்காட்டுகின்றன. உணர்வின் வெளிப்பாடும் உள்ளத்தின் தூண்டலும் சமூகத்தின் மீது கொண்ட கரிசனமும் பதின்மூன்று கதைளின் வழி பன்முகச் சிந்தனைகளைப் பரப்பி வாசகனுக்குள் ஒருவித மாற்றத்தினை உருவாக்கும் என்பது திண்ணம்.