அர்த்தம்

இந்த வாழ்க்கைக்கு அர்த்தம் என்று ஒன்று உள்ளதா அப்படி என்றால் அது “ "  என்ன? ?' என்றைக்கு மனிதர்கள் சிந்திக்கும் திறன் பெறத் துவங்கினார்களோ அன்று தொடங்கி இன்று வரை பூமராங் கேள்வியாக இது சுழன்று சுழன்று வருகிறது.

- அதியன்

சராசரி மனிதனுக்கு வாழ்க்கையின் அர்த்தத்தைப் பற்றி யோசிக்கவெல்லாம் மனமோ நேரமோ இருக்கிறதா என்று தெரியவில்லை ஆனால் தத்துவவியலாளர்களுக்கு இது ஒரு தீராத பிரச்சினையாகவே இன்றும் உள்ளது. இலக்கியத்திற்கு நோக்கம் ஒன்று இருக்க வேண்டுமா? வேண்டாமா? என்பதைப் போன்றே இதுவும் ஒரு முடியாத சர்ச்சையாகத் தொடர்கிறது.

பலப்பல மனிதம் சார்ந்த, மதம் சார்ந்த தலைவர்களும் கோட்பாடுகளும் வாழ்க்கையின் அர்த்தம் குறித்து விலாவாரியாகப் பேசியுள்ளனர். அந்த வகையில் தலாய்லாமா எனக்கு மிகவும் பிடித்த ஒரு துறவி. அவர் என்ன சொல்கிறார் என்றால்

“வாழ்க்கைக்கு என்ன அர்த்தம் என்பதற்கு விடையை கண்டுபிடிப்பதை விட வாழ்க்கைக்கு என்ன அர்த்தத்தை நீங்கள் வழங்கலாம் என்று யோசியுங்கள்" என்று சொல்லிவிட்டார்.

தலாய் லாமா பெரியவர், அவருக்கு பல வேலைகள் இருக்கலாம்; ஆனால் நம்மைப் போன்ற அதிக வேலை பளு இல்லாதவர்கள் இப்பிரச்சனையை அவ்வாறு விட்டு விட முடியுமா? தொட்டனைத் தூறும் மணற்கேணி என்று அய்யன் கூறிவிட்ட பிறகு மனக்கேணியை தூர்வாரவிட்டால் எப்படி? என்று தன் முயற்சியில் சற்று மனம் தளராத விக்ரமாதித்தன் போல இதற்கு ஒரு விடையை கண்டே ஆக வேண்டும் என்று சபதம் ஏற்காத குறையாக சிந்தித்துக் கொண்டிருந்த போது எதிர்ப்பட்ட நண்பர் ஒருவரிடம்,

 “வாழ்க்கை என்பது என்ன சார்? அதுக்கு என்னதான் அர்த்தம்?” என்று கேட்டேன்.