സമ്മർസ്കൂൾ ഇല്ലാത്ത ബാല്യകാലം

ഒരു ആധുനിക സമൂഹത്തിൽ മതരഹിതരായി വേണം നമ്മൾ ജീവിക്കേണ്ടത് എന്ന ആശയം എക്കാലവും മുന്നോട്ട് വെക്കുന്ന വ്യക്തിയാണ് കവി കുരീപ്പുഴ. അദ്ദേഹത്തിന്റെ വ്യക്തി ജീവിതം അതിന് ഉദാഹരണവും ആണ്. തന്റെ ബാല്യകാലത്തെ ചില അവധിക്കാല ചിത്രങ്ങളാണ് അദ്ദേഹം ഇവിടെ വരച്ചിടുന്നത്. വ്യത്യസ്തങ്ങളായ അവധിക്കാല ഇത്തരം അനുഭവങ്ങൾ മുതിർന്നവർ പലർക്കും കാണും. കൂട്ടുകാർ അന്വേഷിച്ചറിയൂ. യുറീക്കയ്ക്കെഴുതൂ...

- കുരീപ്പുഴ ശ്രീകുമാർ

മാർച്ചിലെ പരീക്ഷകഴിഞ്ഞാൽ വീട്ടിലേക്ക് ഒരു ഓട്ടമാണ്. അതിനു മുമ്പ് കൂട്ടുകാരുടെ ഷർട്ടിൽ മഷികുടയുക എന്നൊരു ഹോളി ആഘോഷവും ഉണ്ടാകും. വീട്ടിൽ ചെന്നാൽ അവസാന പരീക്ഷയ്ക്ക് കൊണ്ടുപോയ പുസ്തകങ്ങൾ വലിച്ചെറിയും. പിന്നെ രണ്ടു മാസത്തേക്ക് അവ തൊടുക പോലുമില്ല.

വീട്ടിൽ അമ്മ സൂക്ഷിച്ചു വച്ചിരിക്കുന്ന ദിനപത്രങ്ങൾ വില്ക്കുന്നത് അപ്പോഴാണ്. കിട്ടുന്ന പണത്തിന് മുഴുവൻ മാമ്പഴം വാങ്ങും. അവ മെത്തപ്പൂളും കൊച്ചുപൂളുമായി മുറിച്ച് പരന്ന പാത്രത്തിലിട്ട് ഉപ്പും മുളകുപൊടിയും കലർത്തി കഴിക്കും.