ഗാന്ധിയുടെ മതേതരത്വം

രാഷ്ട്രപിതാവ് മഹാത്മാഗാന്ധിയുടെ പ്രാർത്ഥനായോഗ ങ്ങളെപ്പറ്റി കൂട്ടുകാർ കേട്ടിട്ടുണ്ടല്ലോ. ജനങ്ങളോട് പറയാനുള്ള പല കാര്യങ്ങളും ഈ പ്രാർത്ഥനായോഗങ്ങളിലൂടെയാണ് അദ്ദേഹം വെളിപ്പെടുത്തിയിരുന്നത്. അതിനെക്കുറിച്ച് കൂടുതൽ വായിക്കൂ...

- പി.എൻ. ഗോപീകൃഷ്ണൻ

ഗാന്ധിജിയുടെ പ്രാർത്ഥനാസമ്മേളനങ്ങളെക്കുറിച്ച് നിങ്ങൾ കേട്ടിട്ടുണ്ടല്ലോ. തനിക്ക് ജനങ്ങളോട് പറയാനുള്ള പല കാര്യങ്ങളും ഈ പ്രാർത്ഥനാ സമ്മേളനങ്ങളിലൂടെയാണ് അദ്ദേഹം വെളിപ്പെടുത്തിയിരുന്നത്. അതായത് ഗാന്ധിജിയുടെ സംവേദനത്തിന്റെ ഒരു മാധ്യമം പ്രാർത്ഥനാ സമ്മേളനങ്ങളിൽ തടിച്ചുകൂടിയ ജനങ്ങളായിരുന്നു. അവർ ഗാന്ധിജിയുടെ വക്താക്കളായി ആ സന്ദേശം സമൂഹത്തിലെമ്പാടും പ്രചരിപ്പിച്ചു. അതുകൊണ്ടുതന്നെ ഗാന്ധിജിയുടെ പ്രാർത്ഥനാസമ്മേളനങ്ങൾക്ക് വലിയ പ്രസക്തിയുണ്ടായിരുന്നു.

ഗാന്ധിജിയുടെ സമ്മേളനങ്ങളിൽ ആലപിക്കപ്പെട്ടിട്ടുള്ള ഗാനങ്ങൾ പിന്നീട് ഇന്ത്യ മുഴുവൻ പരക്കുകയുണ്ടായിട്ടുണ്ട്. അതിൽ ഏറ്റവും പ്രശസ്തമായ ഗാനമാണ് രഘുപതി രാഘവ രാജാറാം പതീത പാവന സീതാറാം ഈശ്വർ അള്ളാ തേരേ നാം സബ്കോ സന്മതി ദേ ഭഗവാൻ എന്ന് പറയുന്ന രാംധൻ (രാമസ്തുതി). ഇതിന് പിന്നിലുള്ള യഥാർത്ഥ ചരിത്രം നമ്മൾ മനസ്സിലാക്കേണ്ടതുണ്ട്.

ഇത് ഗാന്ധിജി സൃഷ്ടിച്ച പ്രാർത്ഥനാഗീതമല്ല. ഗുജറാത്തിലെ പ്രാണാമി വൈഷ്ണവ സമൂഹം കാലാകാലങ്ങളായി പാടിക്കൊണ്ടിരിക്കുന്ന ഒന്നാണ്. ഇന്ത്യയുടെ ജനജീവിതത്തെപ്പറ്റിയുള്ള വലിയൊരു സങ്കല്പം അതിന്റെയുള്ളിലുണ്ട്. ഹിന്ദുക്കളും മുസ്ലിങ്ങളും മറ്റുള്ള വരും ഉൾപ്പെടെ നിരവധി മതങ്ങളിൽ പെട്ട ആളുകൾ ഒന്നിച്ചു ജീവിക്കുന്ന സ്ഥലമാണ് ഇന്ത്യ. അവരുടെ ദൈവങ്ങളെയൊക്കെ കൂട്ടിവെച്ചതുകൊണ്ട് ഒരു തരത്തിലുള്ള വൈരവും ഉണ്ടാവുന്നില്ല എന്ന് ഭക്തിപ്രസ്ഥാനം നമ്മ പഠിപ്പിച്ചിട്ടുണ്ട്. കബീറിനെപ്പോലെയും കാശ്മീരിലെ ലാൽ ദത്തിനെപ്പോലെയുമുള്ള കവികൾ ഈ കൂട്ടത്തിൽ പെടുന്നവരാണ്.