സരോജിനി നായിഡു

ഗാന്ധിയുടെ രക്തസാക്ഷിത്വത്തിനുശേഷം 1948 ഫെബ്രുവരി ഒന്നിന് അവർ ആകാശ വാണിയിലൂടെ പറഞ്ഞു: എന്റെ പിതാവ് വിശ്രമിക്കുന്നില്ല, നമ്മെ വിശ്രമിക്കാൻ അനുവദിക്കുന്നുമില്ല. അങ്ങ് ആരുടെ ജീവിതമാണോ ശക്തമാക്കിയത്, അങ്ങയുടെ മരണംകൊണ്ട് തന്നെ അത് കൂടുതൽ ശക്തമായിരിക്കുന്നു.

- ടി. പുഷ്പ

സർവദേശീയ വനിതാദിനം മാർച്ച് 8 ആണ്. ഇന്ത്യയ്ക്ക് ഒരു വനിതാദിനമുണ്ട്. അത് ഫെബ്രുവരി 13 നാണ്. അന്ന് ഇന്ത്യയുടെ സ്വാതന്ത്ര്യസമരനായികയും കവിയും നയതന്ത്രജ്ഞയുമായ സരോജിനി നായിഡുവിന്റെ ജന്മദിനമാണ്.

“ഞാൻ ജീവിച്ചിരിക്കുന്നിടത്തോളം കാലം സ്വാതന്ത്ര്യബോധം എന്റെ രക്തത്തിൽ നിന്നും മായുകയില്ല. ഞാൻ ഒരു സ്ത്രീയാണ്. കവിയാണ്... ഒരു സ്ത്രീയെന്ന നിലയിൽ ആത്മവിശ്വാസത്തിന്റെയും ധൈര്യത്തിന്റെയും പടവാൾ ഞാൻ നിങ്ങൾക്ക് തരുന്നു. ഒരു കവിയെന്ന നിലയിൽ സമരകാഹളം മുഴക്കുന്നു.” പ്രസിദ്ധ സ്വാതന്ത്ര്യസമരനായികയും ദേശീയകവിയുമായിരുന്ന സരോജിനി നായിഡുവിന്റെ വാക്കുകളാണിത്. ഇന്ത്യൻ നാഷണൽ കോൺഗ്രസ്സിന്റെ ഇന്ത്യക്കാരിയായ ആദ്യപ്രസിഡണ്ടായിരുന്നു അവർ.