വിമാനങ്ങളുടെ കഥ

കിളികൾ പറക്കുന്ന പോലെ ചിറകടിച്ച് ആകാശത്ത് പാറിപ്പറക്കാൻ പണ്ടു മുതലേ മനുഷ്യർക്ക് കൊതി തോന്നിയിട്ടുണ്ട്. ചിലർ ചിറകുപോലെ ചിലതെല്ലാം കെട്ടിവച്ച് പറക്കാൻ നോക്കി പരാജയങ്ങൾ ഏറ്റു വാങ്ങിയിട്ടുണ്ട്.

- ഡോ. എൻ. ഷാജി

കിളികൾ പറക്കുന്ന പോലെ ചിറകടിച്ച് ആകാശത്ത് പാറിപ്പറക്കാൻ പണ്ടു മുതലേ മനുഷ്യർക്ക് കൊതി തോന്നിയിട്ടുണ്ട്. ചിലർ ചിറകുപോലെ ചിലതെല്ലാം കെട്ടിവച്ച് പറക്കാൻ നോക്കി പരാജയങ്ങൾ ഏറ്റു വാങ്ങിയിട്ടുണ്ട്. പണ്ടത്തെ പല കഥകളിലും പറക്കുന്ന യന്ത്രങ്ങൾ ഭാവനയിൽ വിവരിച്ചിട്ടുണ്ട്. 18-ാം നൂറ്റാണ്ടിൽ ചിലർ ചൂടുവായുവും ഹൈഡ്രജനും നിറച്ച ബലൂണുകളിൽ യാത്ര ചെയ്തിട്ടുണ്ട്. എന്നാൽ വായുവിനെക്കാൾ ഭാരം കൂടിയ വിമാനങ്ങളുണ്ടാക്കി മനുഷ്യർക്ക് പറക്കാൻ ആദ്യമായി കഴിഞ്ഞത് 20-ാം നൂറ്റാണ്ടിൽ മാത്രമാണ്. വളരെ പണ്ട് ഇതെന്തു കൊണ്ട് സാധ്യമായില്ല എന്നു ചോദിച്ചാൽ ഉത്തരം കുറച്ചു വിശദമായി പറയേണ്ടി വരും.

വിമാനയാത്ര സാധ്യമാകുന്നതിനു മുമ്പേ പലകാര്യങ്ങളും തീരുമാനമാകേണ്ടിയിരുന്നു. ഒന്നാമതായി അതിന്റെ ഡിസൈൻ അഥവാ രൂപകല്പന. അതു ചെയ്യുന്നതിന് വിമാനത്തിൽ പ്രവർത്തിക്കുന്ന വിവിധ തരം ബലങ്ങളെക്കുറിച്ച് അറിയണം. ഭൂമിയുടെ ഗുരുത്വാകർഷണബലം വിമാനത്തെ എപ്പോഴും താഴേക്ക് വലിച്ചുകൊണ്ടിരിക്കും. വിമാനം എങ്ങോട്ടോടിയാലും വായുവിന്റെ ഘർഷണം അതിനെതിരെ പ്രവർത്തിച്ചു കൊണ്ടിരിക്കും. വിമാനത്തെ ഉയർത്തി നിർത്തുന്നത് ബർണോളി തത്വം അനുസരിച്ചുണ്ടാകുന്ന മുകളിലോട്ടുള്ള ബലമാണ്. അതിനെ മുന്നോട്ടു നീക്കുന്നത് എഞ്ചിൻ പ്രവർത്തി ക്കുമ്പോൾ ഉണ്ടാകുന്ന ബലമാണ്. ഇതിനെ ഓരോന്നിനെക്കുറിച്ചും വ്യക്തമായി അറിഞ്ഞാലാണ് വിമാനം ഉണ്ടാക്കാൻ കഴിയുക.