12 வயது இயக்குநரின் அனிமேஷன் படம்!

பனிரெண்டு வயதில் சினிமா இயக்குநர் ஆக முடியுமா?

- எஸ்.ராஜா

‘முடியும்’ என்கிறார் அகஸ்தி.ஏழாம் வகுப்பு படிக்கும் பனிரெண்டு வயது மாணவியான அகஸ்தி, சிறுவயதிலேயே ‘குண்டான்சட்டி’ என்ற அனிமேஷன் படத்தை உருவாக்கி அனைவரையும் ஆச்சர்யப்படுத்தியுள்ளார். அகஸ்தியின் ‘குண்டான்சட்டி’ படத்துக்கு அப்பா கார்த்திகேயன்தான் தயாரிப்பாளர். டிரைலர் வெளியீட்டு விழாவுக்காக சென்னை வந்த அகஸ்தியிடம் பேசினோம்.

மாணவி அகஸ்திக்கு டைரக்‌ஷன் பண்ணும் ஆசை எப்படி வந்தது?

சிறுவயது தொடங்கி எனக்கு படிப்பில் ஆர்வம் அதிகம். பாடப் புத்தகங்கள் மட்டுமல்லாமல், இலக்கியம், தலைவர்களின் வரலாறு என பல்வேறு புத்தகங்களை ஆர்வத்துடன் படிப்பேன். பள்ளிக்கூடத்தில் நடக்கும் கலை, இலக்கிய விழாக்களில் ஆர்வத்துடன் கலந்து கொள்வேன்.புத்தக வாசிப்பு பழக்கம்தான் சினிமாவுக்கான முதல் விதையைத்தூவியது என்று சொல்லலாம். நாளடைவில் வாசிப்பு அனுபவம் சொந்தமாக புத்தகம் எழுதும்  ஆர்வத்தையும், ஆவலையும் தூண்டியது. அதன்படி புத்தகம் எழுத வேண்டும் என்ற என்னுடைய ஆவலை வீட்டில் சொன்னதும் ஊக்கப்படுத்தினார்கள். அதன்படி ஒரு புத்தகம் எழுதி முடித்தேன்.

விடுமுறை நாட்களில் குழந்தைகளுக்கான கார்ட்டூன் சேனல்களை விரும்பிப் பார்ப்பேன். தொடர்ந்து கார்ட்டூன் படங்கள் பார்த்ததால் அனிமேஷன் படங்கள் மீது அதிக ஈர்ப்பு வந்ததோடு, ஏன் நாமும் அனிமேஷன் படம் எடுக்கக்கூடாது என்ற கேள்வி வந்தது.ஓய்வு நேரங்களில் நிறைய வீடியோஸ் எடுத்து யூடியூபில் போடுவேன். சில குறும்படங்களிலும் நடிக்கவும் செய்துள்ளேன். எனக்கிருந்த அந்த கொஞ்ச கேமரா அனுபவத்தின் அடிப்படையில் அனிமேஷன் படம் எடுக்கலாம்னு முடிவு பண்ணினேன்.

புத்தகம் எழுதப்போகிறேன் என்று சொன்னபோது வீட்டில் ஒத்துழைப்பு கொடுத்து உற்சாகப்படுத்தியதால், அனிமேஷன் படம் பற்றிய என்னுடைய முடிவையும் சொன்னேன். ஆரம்பத்தில் படிப்புல கவனம் செலுத்தினால் போதும், சினிமா வேண்டாம்னு வீட்டில் சொல்லிவிட்டார்கள்.

என்னுடைய ஆர்வத்தைப் புரிந்து கொண்டவர்கள் என் முடிவுக்கு சம்மதம் சொன்னதோடு அப்பா, அம்மா, அக்கா என குடும்பமாக சப்போர்ட் பண்ணினார்கள். பள்ளி ஆசிரியர்கள், சக மாணவிகள் என அனைவரும் என்னுடைய முயற்சிக்கு வாழ்த்துகள் சொன்னதுடன் உதவியாகவும் இருந்தார்கள்.