விவசாயம் செய்ய பரோலில் வந்த கொலைக் 'குற்றவாளி!

சமீபத்தில் வெளியான செய்தி ஒன்று, இந்திய நீதித்துறையை மட்டுமல்லாமல், பொது மக்களையும் ஆச்சர்யத்தில் மூழ்கடித்துள்ளது.

- த.சக்திவேல்

குற்றம் நிரூபிக்கப்பட்டு, ஆயுள் தண்டனையை அனுபவித்து வரும் ஒரு கொலைக் குற்றவாளியை, விவசாயம் செய்வதற்காக 90 நாட்கள் பரோலில் விடுவித்துள்ளது கர்நாடகாவின் உயர் நீதிமன்றம் என்பதுதான் அந்தச் செய்தி.

அதென்ன பரோல்?

கோடை விடுமுறையைப் போல சிறைவாசத்திலிருந்து கிடைக்கும் விடுமுறைக்குப் பெயர்தான், பரோல். இது சிறைச்சாலையின் சட்டம் மற்றும் விதிகளுக்கு உட்பட்டது.

குறிப்பாக சிறைச்சாலையில் எந்தவித பிரச்னையும் செய்யாமல், நன்னடத்தையுடன் நடந்துகொண்ட சிறைக் கைதிகளுக்கு மட்டுமே பரோல் கிடைக்கிறது. 

அதுவும் அந்தக் கைதிகள் தங்களின் குடும்பங்களில் நடக்கும் முக்கிய நிகழ்வுகள், உறவினர்களின் மரணம், நோய்க்கான சிகிச்சை, மகன், மகள் போன்ற நெருங்கிய உறவுகளின் திருமணம், சொத்துப்பிரச்னை போன்ற முக்கியமான காரணங்களுக்காக மட்டுமே பரோல் வழங்கப்படுகிறது.

விண்ணப்பிக்கும் எல்லோருக்குமே பரோல் கிடைப்பதில்லை என்பது குறிப்பிடத்தக்கது. தவிர, ஒரு கைதி பரோலில் 10 நாட்கள் செல்கிறார் என்றால், அந்த 10 நாட்களைச் சிறைத்தண்டனையிலிருந்து கழிக்க மாட்டார்கள். மொத்த சிறைத்தண்டனைக் காலத்துடன் சேர்த்து, அந்த 10 நாட்களும் சிறைத்தண்டனையை அனுபவிக்க வேண்டும்.