Polycule...காதலில் இது எந்த வகை!

ஒருவனுக்கு ஒருத்தி என்று இல்லாமல் கணவனும் மனைவியும் பல்வேறு நபர்களுடன் காதல் உறவில் இருப்பதற்குப் பெயர் Polyamory.

அதையும் Molecule எனும் பதத்தையும் இணைத்துஉருவாக்கப்பட்டிருக்கும் புதிய சொல்லே Polycule. இதற்கும் Open Relationshipக்கும் சிற்சில வேறுபாடுகள் உள்ளன. சுதந்திரமான திருமண உறவில் கணவனும் மனைவியும் பல விதமான நபர்களுடன் பழகுவார்கள். கலவி கொள்வார்கள். சில நபர்களுடனான உறவு நீடித்ததாகவோ Casual Fling ஆகவோ One Night Stand ஆகவோ முடிந்துவிடும்.

பழக்க வழக்கமெல்லாம் வீட்டுக்கு வெளியேதான். வீட்டுக்குள் அவர்கள் அன்னியோன்யமான இணையர்கள். சொத்துரிமை, சட்டப் பாதுகாப்பு உண்டு. ஆணோ பெண்ணோ தமது சட்டபூர்வமான இணையுடன் மட்டுமே பிள்ளை பெற்றுக்கொள்ள வேண்டும் என்கிற ஒப்பந்தம் கூடப் போட்டுக் கொள்வார்கள். இதிலிருந்து வேறுபட்டது Polycule. இதைக் குறித்து ‘நியூ யார்க் டைம்ஸி’ல் நல்லதொரு கட்டுரை வெளியாகியுள்ளது.

அமெரிக்காவில் தற்சமயம் மிகக்குறுகிய அளவில் இந்த வழக்கம் நடைமுறையில் உள்ளது. Polycule என்பதை ஒரு Commune ஆக உருவகிக்கலாம். காதலிலுள்ள பலதரப்பட்ட நபர்கள் ஒரே கூரையின் கீழ் வாழும் கூட்டு வாழ்க்கை முறை. அப்படி பாஸ்டனில் வாழ்கிற இருபது ஆட்களைப் பேட்டி எடுத்திருக்கிறார்கள். ஆணும் பெண்ணுமாக இருபத்து ஐந்து வயதிலிருந்து நாற்பது வயது வரை உள்ளவர்கள் இதில் அடக்கம். எல்லோரும் மணமானவர்கள். ஆனால், ஒவ்வொருவரும் ஒன்றுக்கும் மேற்பட்ட ஆட்களைக் காதலிக்கிறார்கள். அவர்கள் அனைவரும் சேர்ந்து ஒரே வீட்டில் வாழ்கிறார்கள். Ethical Non Monogamy (ENM) என்று இதனை அழைக்கிறார்கள்.

கணவனுக்கோ மனைவிக்கோ இன்னொரு நபர் மீது பிரியம் ஏற்பட்டால் அதைப் பகிரங்கமாகத் தன் இணையிடம் ஒப்புக்கொண்டு தங்களது உணர்வுகளுக்கு உண்மையாக இருப்பது என வகுக்கலாம். இதில் கள்ளத்தனமோ ரகசியமோ இல்லாததால் பிறழ் உறவாக (Extra Marital Affair) இதனை அடையாளப்படுத்த இயலாது. பல்வேறு வகையான பாலியல் இச்சைகள் கொண்டவர்களும் சேர்ந்து வாழ்கிறார்கள். தற்பால் ஈர்ப்பாளர்கள், பால் புதுமையர், Asexuals (பாலியல் உந்துதல் இல்லாதோர்), Bisexuals எனப் பாலியல் அடையாளத்தால் யாருக்கும் பாகுபாடு காட்டப்படுவதில்லை.