இரும்புக் குதிரை

இன்று உலகம் முழுவதும் 550க்கும் மேலான பிராண்டுகளில், 40 ஆயிரத்துக்கும் மேலான மாடல்களில் மோட்டார் சைக்கிள்கள் கிடைக்கின்றன. இருந்தாலும், ‘ஹார்லி - டேவிட்சன்’ எனும் பிராண்டுக்குத் தனி மவுசு. 

- த.சக்திவேல்

மோட்டார் சைக்கிள்கள் மீது காதல் கொண்ட ஒவ்வொருவரும் தன்வசமாக்க நினைக்கும் பிராண்ட் இது.

ஸ்டைல், வேகம், தரம், தோற்றம் என எல்லாவற்றிலும் தனித்துவமான மோட்டார் சைக்கிள் இது. துபாய் சாலைகளில் அரிதாகத்தான் மோட்டார் சைக்கிள்களைப் பார்க்க முடியும். அந்த மோட்டார் சைக்கிள்கள் ‘ஹார்லி - டேவிட்சன்’ ஆகத்தான் இருக்கும் என்பது இதன் சிறப்பு.  

ஹார்லி - டேவிட்சன் என்ற நண்பர்களால் உருவானது இந்த பிராண்ட்.இங்கிலாந்திலிருந்து அமெரிக்காவுக்குக் குடிபெயர்ந்த ஒரு குடும்பத்தில், 1880ம் வருடம் பிறந்தார், வில்லியம் ஹார்லி. இவரது தந்தை ரயில்வே துறையில் எஞ்சினியராகப் பணியாற்றி வந்தார். 

ஹார்லியின் குடும்பம் மில்வாக்கி நகரின் வடக்குப்புறத்தில் உள்ள பர்லே அவென்யூவில் வசிக்க ஆரம்பித்தது. அங்கிருந்த சைக்கிள் தயாரிக்கும் நிறுவனத்தில் வேலை செய்யத் தொடங்கினார் ஹார்லி. அப்போது அவரது வயது 15.

இயற்கையாகவே அவருக்கிருந்த மெக்கானிக்கல் அறிவும், சைக்கிள் நிறுவனத்தில் வேலை பார்த்த அனுபவமும் இரு சக்கர வாகனங்களின் மீது தீராத ஆர்வத்தை அவருக்கு உண்டாக்கியது. சைக்கிளில் புதிதாக ஏதாவது செய்ய வேண்டும் என்ற உத்வேகத்திலேயே இருந்தார். 

தனது இருபதாவது வயதில், அதாவது 1901ம் வருடம் ஒரு எஞ்சின் மாடலை ஓவியமாகத் தீட்டினார் ஹார்லி. அந்த எஞ்சினை சைக்கிளுக்குப் பொருத்திப் பார்த்தார். ஆனால், ஹார்லி நினைத்துப் பார்த்த அளவுக்கு சைக்கிள் இயங்கவில்லை. வழக்கம்போல பெடலை மிதிக்க வேண்டியிருந்தது.

சாதாரண சைக்கிளுக்கு எஞ்சின் பயன்படாது; பலமான சைக்கிளை உருவாக்கினால்தான் எஞ்சினுக்குப் பொருத்தமாக இருக்கும் என்று ஹார்லி கண்டறிந்தார்.

மோட்டார் சைக்கிள் மற்றும் எஞ்சின் திட்டங்களைக் குறித்து குழந்தைப்பருவ நண்பரான ஆர்தர் டேவிட்சனிடம் பகிர்ந்தார் ஹார்லி.

டேவிட்சன் வீட்டின் கொல்லைப்புறத்தில், 10 அடி அகலமும், 15 அடி நீளமும் கொண்ட ஒரு மரக்கொட்டகையை அமைத்து ஹார்லியும், டேவிட்சனும் எஞ்சினுக்குத் தகுந்த மோட்டார் சைக்கிளைத் தயாரிக்கும் வேலையில் இறங்கினார்கள்.

இந்தக் கொட்டகையிலிருந்து மாபெரும் மோட்டார் சைக்கிள் நிறுவனமான ‘ஹார்லி- டேவிட்சனி’ன் பயணம் தொடங்குகிறது.