யூடியூபர்ஸை மீடியாவா கருத முடியாது!

உயர்ந்த உருவம், மெலிந்த தேகம், புன்னகை முகம்... இது தான் ப்ரியா பவானி சங்கர்.

- எஸ்.ராஜா

செய்தி ஊடகமான மீடியாவிலிருந்து காட்சி ஊடகமான சினிமாவுக்கு வந்தவர். அறிமுகமான 'மேயாத மான்' படத்திலேயே தன் முத்திரையை அழுத்தமாகப் பதித்தவர். தொடர்ந்து 'பொம்மை', 'ரத்னம்' என பல படங்கள் செய்தவருக்கு 'இந்தியன் - 2', 'டிமாண்டி காலனி - 2' போன்ற படங்கள் நற்பெயர் கொடுத்துள்ளன.

'டிமாண்டி காலனி - 2' அனுபவம் எப்படி இருந்துச்சு?

கமர்ஷியல் படத்தில் ஹீரோவுக்கு சமமா ரோல் கொடுத்த அஜய் ஞானமுத்துவுக்கு நன்றி. அஜய்யை, பேய்க்கதை ஸ்பெஷலிஸ்ட்னு சொல்லலாம்.

அருள்நிதி யதார்த்தமா பழகுவார். எதையுமே மனசுல வெச்சுக்கமாட்டார். யாரையும் புண்படுத்தமாட்டார். எதையாவது பேசிட்டு நான் அப்படி பேசியிருக்கக் கூடாதுல்லன்னு அப்பாவியா கேட்பார்.

'என்னைப் பத்தி எதாவது பேசுறதா இருந்தா தனியா பேசி கலாய்ங்க. மைக் முன்னாடி, பொதுவெளியில வேணாம்'னு சொல்லுவேன். மைக் முன்னாடி நின்னதும் விளையாட்டா முகத்தை என் பக்கம் திருப்புவார். அந்தளவுக்கு ஃபன் பண்ணுவார்.

பேய்க் கதையில் ரொம்ப தாமதமா நடிக்க ஆரம்பிச்சிருக்கீங்களே?

பேய்க் கதைகள் நிறைய வந்துச்சு. க்ளாஸுக்கு லேட்டாவர்ற ஸ்டூடண்ட் மாதிரி எல்லாரும் க்ளாஸ்ல உட்கார்ந்துட்டீங்களேப்பா என்பதுபோல இப்போ தான் ஆரம்பிச்சிருக்கேன்.

என்னுடைய முழுமுதல் பேய்ப் படம் என்றால் தெலுங்கில் நடித்துவரும் 'தாத்தா - 2'. அது வேற மாதிரி பேய்ப்படம். பேயை கண்ல காட்டமாட்டாங்க. ஹாரர் ட்ரீட்மென்ட் வேற லெவலில் இருக்கும்.

சொந்த வாழ்க்கையில பேய்க்கு பயந்த அனுபவம் உண்டா?

நாங்க பெரிய குடும்பம். அப்பா கூட பிறந்தவர்கள் அத்தை இல்லாம 6 பேர். வாண்டூஸ் அதிகம். அதுல ஒரு பெரியப்பா எங்க எல்லாரையும் உட்காரவைத்து பேய்க் கதை சொல்வார். நான் அவரை 'பேய் பெரியப்பா'ன்னு கூப்பிடுவேன். அந்தக் கால வீடுகளில் மச்சு அறைன்னு ஒண்ணு இருக்கும். அந்த அறையில் பண்டிகைக்கு செய்த பலகாரங்களை வெச்சிருப்பாங்க.

நாங்க அந்த ரூமுக்குள்ள போயிடக் கூடாது என்பதற்காக நெத்தில விபூதி பூசி கதை சொல்ல ஆரம்பிச்சுடுவார். அப்போலைட்டா பேய்பயம் இருந்துச்சு. வளர வளர, பெரியப்பா உருட்டுறார்னும், அவர் காப்பாத்த நினைச்சது உள்ள இருக்கிற முறுக்கு, லட்டைத் தானே தவிர எங்களை இல்லன்னும் தெரிஞ்சது.